យោងតាមទីភ្នាក់ងារសារព័ត៌មានផ្លូវការ IRNA បានឲ្យដឹងថា មេបញ្ជាការយោធាជាន់ខ្ពស់អ៊ីរ៉ង់មួយរូប កាលពីថ្ងៃសៅរ៍ (ទី២៤ ខែមករា ឆ្នាំ២០២៦) បាននិយាយថា កងកម្លាំងប្រដាប់អាវុធរបស់ប្រទេសនេះ បានត្រៀមខ្លួនរួចជាស្រេចហើយ ដើម្បីផ្តល់ការឆ្លើយតប «ដែលផ្ដល់នូវអារម្មណ៍សោកស្តាយ» ដល់ «សត្រូវ» ប្រសិនបើពួកគេមាននូវវិធានការណាមួយ ដោយមិនបានពិចារណាឲ្យបានម៉ត់ចត់។

មេបញ្ជាការរងកងឆ្មាំបដិវត្តន៍ឥស្លាមអ៊ីរ៉ង់ លោក Ahmad Vahidi បានធ្វើការកត់សម្គាល់បែបនេះ នៅឯសមាជជាតិ នៅក្នុងខេត្ត West Azarbaijan ភាគពាយព្យនៃប្រទេសអ៊ីរ៉ង់ ខណៈដែលភាពតានតឹង នៅតែមានកម្រិតខ្ពស់ រវាងទីក្រុងតេអេរ៉ង់ និងទីក្រុងវ៉ាស៊ីនតោន ដោយសារការគំរាមកំហែងធ្វើអន្តរាគមន៍របស់សហរដ្ឋអាមេរិក។

លោក Vahidi បាននិយាយថា៖ «នាពេលនេះ យើងមានការត្រៀមខ្លួនប្រសើរខ្លាំងជាងសង្គ្រាមរយៈពេល ១២ថ្ងៃ (អ៊ីស្រាអែល-អាមេរិក) (ក្នុងខែមិថុនាឆ្នាំមុន)។ យើងត្រៀមខ្លួនរួចជាស្រេច ដើម្បីឆ្លើយតបទៅនឹងការប្រថុយប្រថានណាមួយរបស់សត្រូវ តាមវិធីដែលធ្វើឲ្យពួកគេមានអារម្មណ៍សោកស្តាយយ៉ាងខ្លាំង»។

ដោយចង្អុលបង្ហាញពីភាពចលាចលថ្មីៗនេះ នៅក្នុងប្រទេស លោកបានបន្ថែមថា៖ «សត្រូវដែលបានរងគ្រោះយ៉ាងធ្ងន់ធ្ងរដោយសារអ៊ីរ៉ង់ ក្នុងអំឡុងមានសង្គ្រាមរយៈពេល ១២ថ្ងៃ បានប្រឹងប្រែងរកការប៉ះប៉ូវ សម្រាប់ភាពបរាជ័យរបស់ពួកគេ ដោយការញុះញង់ឲ្យមានការបះបោរ ប៉ុន្តែបានប្រឈមនឹងការបរាជ័យយ៉ាងដំណំជាថ្មីម្ដងទៀត ដោយសារការរួបរួម និងសាមគ្គីភាពរបស់ប្រជាជនអ៊ីរ៉ង់»។

គួរបញ្ជាក់ថា ការកត់សម្គាល់របស់លោកបែបនេះ បានកើតឡើងនៅពេលដែលប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍ថា នាវាកងទ័ពជើងទឹក «ដ៏ធំ» របស់សហរដ្ឋអាមេរិក កំពុងធ្វើដំណើរឆ្ពោះទៅកាន់អ៊ីរ៉ង់ហើយ ខណៈពេលដែលបានលើកឡើងថា នាវានេះអាចនឹងមិនត្រូវបានប្រើទេ៕