ប្រមុខអង្គការសុខភាពពិភពលោក (WHO) លោក Tedros Adhanom Ghebreyesus កាលពីថ្ងៃអាទិត្យ (ទី២៥ ខែមករា ឆ្នាំ២០២៦) បាននិយាយថា ហេតុផលដែលសហរដ្ឋអាមេរិក បានបញ្ជាក់សម្រាប់ការដកខ្លួនចេញពីទីភ្នាក់ងារសុខភាពរបស់អង្គការសហប្រជាជាតិមួយនេះ គឺជាការលើកឡើង «មិនពិត» ហើយបានព្រមានថា ការសម្រេចនេះនឹងធ្វើឲ្យពិភពលោកកាន់តែលែងមានសុវត្ថិភាព។

លោក Ghebreyesus បានសរសេរនៅលើបណ្ដាញសង្គម X ថា៖ «ជារឿងគួរឲ្យសោកស្ដាយ ហេតុផលដែលបានលើកឡើង សម្រាប់ការសម្រេចរបស់សហរដ្ឋអាមេរិក ក្នុងការដកខ្លួនចេញពី WHO គឺមិនពិតឡើយ។ ការជូនដំណឹងអំពីការដកខ្លួនធ្វើឲ្យទាំងសហរដ្ឋអាមេរិក និងពិភពលោកមានសុវត្ថិភាពកាន់តែតិចទៅ»។

លោកបានកត់សម្គាល់ថា ក្នុងនាមជាសមាជិកស្ថាបនិក សហរដ្ឋអាមេរិក បានចូលរួមចំណែក «យ៉ាងសំខាន់» ចំពោះសមិទ្ធផលរបស់អង្គការនេះ និងបានបញ្ជាក់ជាថ្មីថា WHO តែងតែចូលរួមជាមួយសហរដ្ឋអាមេរិក និងរដ្ឋជាសមាជិកទាំងអស់ «ប្រកបដោយការគោរពយ៉ាងពេញលេញ ចំពោះអធិបតេយ្យភាពរបស់ពួកគេ»។

លោកបានបន្ថែមថា៖ «យើងសង្ឃឹមថា សហរដ្ឋអាមេរិកនឹងវិលត្រឡប់មកចូលរួមយ៉ាងសកម្មវិញ នៅក្នុង WHO នាពេលអនាគត។ ទន្ទឹមនឹងនេះ WHO នៅតែប្តេជ្ញាចិត្តយ៉ាងមុតមាំ ក្នុងការធ្វើការជាមួយប្រទេសទាំងអស់ ក្នុងការបន្តបេសកកម្មស្នូល និងអាណត្តិរដ្ឋធម្មនុញ្ញរបស់ខ្លួន ដោយធានាឲ្យបាននូវស្តង់ដារសុខភាពខ្ពស់បំផុតដែលជាសិទ្ធិជាមូលដ្ឋាន សម្រាប់មនុស្សគ្រប់រូប»។

WHO បានបញ្ជាក់ថា ខ្លួនគាំទ្រការឆ្លើយតបរបស់ខ្លួន ចំពោះជំងឺកូវីដ១៩ ដោយបដិសេធការអះអាងរបស់សហរដ្ឋអាមេរិក ដែលថា ខ្លួនបានបរាជ័យ និងរារាំងការចែករំលែកព័ត៌មានសំខាន់ៗទាន់ពេលវេលា និងត្រឹមត្រូវ។

គួរបញ្ជាក់ថា មន្ត្រីអាមេរិក បានឲ្យដឹងថា សហរដ្ឋអាមេរិកបានដកខ្លួនទាំងស្រុងចេញពី WHO ជាផ្លូវការ ដោយបញ្ចប់សមាជិកភាពជិត ៧៨ឆ្នាំ។ ការចាកចេញនេះបានចូលជាធរមាននៅថ្ងៃទី២២ ខែមករា បន្ទាប់មានពីរយៈពេលជូនដំណឹងមួយឆ្នាំដែលតម្រូវក្រោមច្បាប់អន្តរជាតិ។ ប្រធានាធិបតីសហរដ្ឋអាមេរិក លោក Donald Trump គឺជាអ្នករិះគន់យ៉ាងខ្លាំងជាយូរមកហើយ ចំពោះ WHO ជាពិសេសក្នុងអំឡុងពេល និងក្រោយជំងឺរាតត្បាតកូវីដ១៩៕