អគារលំនៅឋានប្រហែល ១.៧០០ខ្នង នៅក្នុងរដ្ឋធានីគីវរបស់ប្រទេសអ៊ុយក្រែន នៅតែគ្មានប្រព័ន្ធកម្ដៅ បន្ទាប់ពីមានការវាយប្រហារដោយមីស៊ីល និងយានដ្រូនរបស់រុស្ស៊ី កាលពីដើមសប្តាហ៍នេះ។ នេះបើតាមអភិបាលក្រុង លោក Vitalii Klitschko ដែលបាននិយាយនៅថ្ងៃអាទិត្យ (ទី២៥ ខែមករា ឆ្នាំ២០២៦) នេះ។

ទីក្រុងមូស្គូបានបង្កើនការទម្លាក់គ្រាប់យ៉ាងខ្លាំងក្លាទៅលើប្រព័ន្ធថាមពលរបស់អ៊ុយក្រែន ចាប់តាំងពីបានឈ្លានពានប្រទេសជិតខាងរបស់ខ្លួន ក្នុងឆ្នាំ២០២២។ រុស្ស៊ីបានបើកការវាយប្រហារយ៉ាងទូលំទូលាយលើប្រព័ន្ធថាមពលរបស់អ៊ុយក្រែន កាលពីថ្ងៃសៅរ៍ ដោយបានធ្វើឲ្យទីក្រុងគីវរញ្ជួយជាមួយនឹងសំឡេងផ្ទុះ នាពេលយប់ ដែលនាំឲ្យអចលនទ្រព្យចំនួន ១,២លានកន្លែង គ្មានអគ្គិសនីប្រើប្រាស់ទូទាំងប្រទេស ក្នុងអំឡុងពេលមានសីតុណ្ហភាពក្រោមសូន្យ នារដូវរងា។

ប្រធានាធិបតីអ៊ុយក្រែន លោក Volodymyr Zelenskiy បានលើកឡើងនៅលើបណ្ដាញសង្គម X ថា៖ «គោលដៅចម្បងរបស់រុស្ស៊ី នាពេលនេះ គឺវិស័យថាមពលរបស់យើង ហេដ្ឋារចនាសម្ព័ន្ធសំខាន់ៗ និងអគារលំនៅឋាន»។ លោកបានបញ្ជាក់ថា ក្នុងសប្តាហ៍នេះតែមួយ រុស្ស៊ីបានវាយប្រហារលើអ៊ុយក្រែន ដោយយានដ្រូនវាយប្រហារជាង ១.៧០០គ្រឿង គ្រាប់បែកពីលើអាកាសមានប្រព័ន្ធបញ្ជានាំផ្លូវជាង ១.៣៨០គ្រាប់ និងមីស៊ីល ៦៩គ្រាប់។

លោកឧបនាយករដ្ឋមន្ត្រី Oleksiy Kuleba បាននិយាយកាលពីថ្ងៃសៅរ៍ថា អគារជាង ៣.២០០ខ្នង នៅទីក្រុងគីវ គ្មានប្រព័ន្ធកម្ដៅ នៅល្ងាចនោះ ដោយចុះពីកម្រិតនាពេលព្រឹក ៦.០០០ខ្នង។

លោក Klitschko បានឲ្យដឹងនៅលើកម្មវិធីផ្ញើសារ Telegram ថា៖ «ចាប់តាំងពីល្ងាចម្សិលមិញ (ថ្ងៃសោរ៍) បុគ្គលិកអគ្គិសនី និងក្រុមហ៊ុនថាមពល បានស្តារការផ្គត់ផ្គង់ប្រព័ន្ធកម្ដៅដល់អគារជាង ១.៦០០ខ្នងឡើងវិញ។ ហើយពួកគេកំពុងបន្តធ្វើការ ដើម្បីស្តារសេវាកម្មឡើងវិញ សម្រាប់លំនៅឋានរបស់អ្នកក្រុងគីវ»។

ការវាយប្រហារទ្រង់ទ្រាយធំលើរដ្ឋធានីអ៊ុយក្រែននេះ បានកើតឡើង នៅពេលដែលអ្នកចរចាអ៊ុយក្រែន រុស្ស៊ី និងអាមេរិក កំពុងពិភាក្សា អំពីជម្រើសនានា នៅទីក្រុង Abu Dhabi ប្រទេសអារ៉ាប់រួម ដើម្បីបញ្ចប់សង្គ្រាម៕