ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យ (២៥ មករា) ថា ឯកសាររបស់សហរដ្ឋអាមេរិក ស្តីពីការធានាសន្តិសុខសម្រាប់អ៊ុយក្រែន គឺរួចរាល់ទាំងស្រុងហើយ ហើយទីក្រុងគីវ កំពុងរង់ចាំពេលវេលា និងទីកន្លែងសម្រាប់ការចុះហត្ថលេខា ដែលបង្ហាញថា កិច្ចពិភាក្សាចុងសប្តាហ៍ជាមួយរុស្ស៊ី នៅទីក្រុងអាប៊ូដាប៊ី បានឈានដល់វឌ្ឍនភាពខ្លះដែរ។

ថ្លែងក្នុងសន្និសីទសារព័ត៌មានមួយក្នុងអំឡុងទស្សនកិច្ចនៅរដ្ឋធានីលីទុយអានី លោក Zelenskyy បានលើកឡើងថា៖ សម្រាប់អ៊ុយក្រែន ការធានាសន្តិសុខគឺជាការធានាមុនដំបូងគេ និងសំខាន់បំផុតពីសហរដ្ឋអាមេរិក។ ឯកសារនេះរួចរាល់ ១០០% ហើយ ហើយភាគីអ៊ុយក្រែន កំពុងរង់ចាំដៃគូរបស់ខ្លួនបញ្ជាក់ពីកាលបរិច្ឆេទ និងទីកន្លែងដែលនឹងចុះហត្ថលេខាលើឯកសារនេះ។ លោកបន្តថា៖ «បន្ទាប់មក ឯកសារនេះនឹងត្រូវផ្ញើទៅសភាសហរដ្ឋអាមេរិក និងសភាអ៊ុយក្រែន ដើម្បីស្នើសុំសច្ចាប័ន»។

កាលពីថ្ងៃសុក្រនិងថ្ងៃសៅរ៍ សប្ដាហ៍មុន ក្រុមអ្នកចរចាអ៊ុយក្រែន និងរុស្ស៊ី បានរៀបចំកិច្ចប្រជុំត្រីភាគីជាលើកដំបូងរបស់ពួកគេ រួមទាំងវត្តមានអ្នកសម្របសម្រួលសហរដ្ឋអាមេរិក នៅទីក្រុងអាប៊ូដាប៊ី ដើម្បីពិភាក្សាពីក្របខណ្ឌរបស់ទីក្រុងវ៉ាស៊ីនតោន សម្រាប់ការបញ្ចប់សង្គ្រាមអាយុកាលជិត ៤ឆ្នាំមកនេះ ប៉ុន្តែមិនមានកិច្ចព្រមព្រៀងណាមួយលេចចេញជារូបរាងឡើងជាផ្លូវការពីជំនួបនោះទេ។

ទោះជាបែបនេះក្ដី មន្ត្រីសហរដ្ឋអាមេរិកមួយរូបបានប្រាប់អ្នកយកព័ត៌មានភ្លាមៗបន្ទាប់ពីកិច្ចពិភាក្សាចុងសប្តាហ៍មុននោះថា ទីក្រុងមូស្គូ និងទីក្រុងគីវ សុទ្ធតែបាននិយាយថា ពួកគេបើកចំហចំពោះកិច្ចសន្ទនាបន្ថែមទៀត ហើយការពិភាក្សាបន្ថែមទៀតក៏ត្រូវបានរំពឹងថា នឹងធ្វើឡើងនៅថ្ងៃអាទិត្យសប្ដាហ៍នេះនៅទីក្រុងអាប៊ូដាប៊ីផងដែរ៕