សេចក្ដីរាយការណ៍ពីសារព័ត៌មានរ៉យទ័រ បាននិយាយកាលពីថ្ងៃអាទិត្យ (២៥ មករា) ថា ការបាញ់ប្រហារលើបុរសម្នាក់បណ្ដាលឱ្យស្លាប់ នៅទីក្រុង Minneapolis កាលពីថ្ងៃសៅរ៍ បានបន្ថែមចំនួនអ្នកស្លាប់កាន់តែច្រើនឡើងៗ នៅក្នុងការជំរុញអន្តោប្រវេសន៍កាន់តែខ្លាំងក្លារបស់លោកប្រធានាធិបតីអាមេរិក Donald Trump ក្នុងខែមករានេះ ដែលបានបង្កើនការត្រួតពិនិត្យលើការបង្ក្រាបយ៉ាងតឹងរ៉ឹង ស្របពេលប្រតិកម្មតបពីក្រុមមន្រ្តីរដ្ឋ និងអ្នកស្រុក ក៏កាន់តែខឹងសម្បា។

ហេតុការណ៍ថ្ងៃសៅរ៍នោះ គឺជាការបាញ់ប្រហារមួយក្នុងចំណោមការបាញ់ប្រហារចំនួន៥ ក្នុងខែមករា ឆ្នាំ២០២៦ ពាក់ព័ន្ធនឹងភ្នាក់ងារសហព័ន្ធ ដែលអនុវត្តច្បាប់អន្តោប្រវេសន៍ រួមទាំងការបាញ់ប្រហារបណ្ដាលឱ្យស្លាប់លើស្ត្រីម្នាក់ ឈ្មោះ Renee Good នៅរដ្ឋ Minnesota។ របាយការណ៍និយាយថា យ៉ាងហោចណាស់ មានជនអន្តោប្រវេសន៍ចំនួន ៦នាក់ បានស្លាប់នៅក្នុងខែនេះ ក្នុងការឃុំឃាំងអន្តោប្រវេសន៍សហព័ន្ធ ដែលជាល្បឿនដ៏លឿនមិនធម្មតា។

រដ្ឋបាលលោក Trump កំពុងបង្កើនការអនុវត្តច្បាប់អន្តោប្រវេសន៍យ៉ាងខ្លាំង ជាមួយនឹងថវិកាចំនួន ១៧០ពាន់លានដុល្លារ សម្រាប់ភ្នាក់ងារអន្តោប្រវេសន៍រហូតដល់ខែកញ្ញា ឆ្នាំ២០២៩ ដែលជាចំនួនទឹកប្រាក់ដ៏ច្រើនជាប្រវត្តិសាស្ត្រ។

ទីក្រុង Minneapolis ក្លាយជាចំណុចកណ្តាលនៃការបង្ក្រាបរបស់លោក Trump ក្នុងខែមករា ដោយមានភ្នាក់ងារប្រហែល ៣ពាន់នាក់ ត្រូវដាក់ពង្រាយ។ ហ្វូងបាតុកររាប់ពាន់នាក់ បានចេញតវ៉ាតាមដងផ្លូវអស់ជាច្រើនថ្ងៃ ទោះបីជាសីតុណ្ហភាពក្រោមសូន្យក៏ដោយ ដើម្បីសម្តែងការប្រឆាំងនឹងការអនុវត្តច្បាប់អន្តោប្រវេសន៍ និងទាមទារឱ្យលោក Trump ដកភ្នាក់ងារទាំងនោះចេញទៅវិញ។

លោក Trump អះអាងថា ប្រតិបត្តិការយោធានេះគឺចាំបាច់ណាស់ ដើម្បីដកឧក្រិដ្ឋជនចេញពីសហរដ្ឋអាមេរិក ឱ្យអស់ ប៉ុន្តែរបាយការណ៍បាននិយាយថា អ្នកដែលត្រូវបានចាប់ខ្លួនជាច្រើន គឺដោយសារតែលទ្ធភាពនៃការរំលោភលើអន្តោប្រវេសន៍ស៊ីវិលប៉ុណ្ណោះ ដែលស្មើនឹងការរំលោភច្បាប់ចរាចរណ៍ជាដើម៕