អភិបាលរដ្ឋ Minnesota លោក Tim Walz ទាមទារឱ្យលោក Trump ដកភ្នាក់ងារអន្តោប្រវេសន៍សហព័ន្ធ "ដែលពុំបានបណ្តុះបណ្តាល" ចេញពីរដ្ឋបន្ទាប់ពីការបាញ់សម្លាប់បាតុករម្នាក់នៅទីក្រុង Minneapolisជាការសម្លាប់លើកទីពីរក្នុងទីក្រុងនេះស្របពេលការបង្ក្រាបអន្តោប្រវេសន៍នៅតែបន្ត។

ខណៈការអំពាវនាវឱ្យមានការស៊ើបអង្កេតឯករាជ្យមួយបានកើនឡើងចំពោះការសម្លាប់លោក Alex Pretti ដែលជាគិលានុបដ្ឋាក ICUវ័យ៣៧ ឆ្នាំ លោក Walz បានសួរសំណួរដោយផ្ទាល់ទៅកាន់លោក Trump ក្នុងអំឡុងពេលសន្និសីទសារព័ត៌មានមួយកាលពីថ្ងៃអាទិត្យ ដោយសួរថា នោះជាផែនការអ្វី?តើយើងត្រូវធ្វើអ្វីដើម្បីដកទីភ្នាក់ងារសហព័ន្ធទាំងនេះចេញពីរដ្ឋរបស់យើងបាន?។

អ្នកទីក្រុង Minnesota រួមទាំងក្រុមគិលានុបដ្ឋាកផង បានប្រមូលផ្ដុំគ្នាកាលពីថ្ងៃអាទិត្យ២៥មករាដើម្បីដើរក្បួនតវ៉ាទៅកាន់ Minneapolis City Hall ទាមទារយុត្តិធម៌ដែលទីភ្នាក់ងារអន្តោប្រវេសន៍សហព័ន្ធ ICE បានបាញ់សម្លាប់ពលរដ្ឋអាមេរិកម្នាក់ទៀត។

ជាមួយគ្នានោះការប៉ះទង្គិចគ្នាបានកើតឡើង នៅកន្លែងដែលបុរសរងគ្រោះត្រូវបានទីភ្នាក់ងារសហព័ន្ធបាញ់សម្លាប់។នេះជាលើកទី២ហើយនៃហេតុការណ៍បាញ់សម្លាប់ពីសំណាក់ក្រុមទីភ្នាក់ងារសហព័ន្ធនៅខែនេះ អំឡុងការអនុវត្តន៍ច្បាប់បង្ក្រាបអន្តោប្រវេសន៍ក្នុងទីក្រុងភាគខាងជើងរបស់អាមេរិកមួយនេះ។

ទីភ្នាក់ងារសហព័ន្ធបានបាញ់សម្លាប់លោក Pretti កាលពីថ្ងៃសៅរ៍ ខណៈកំពុងប៉ះទង្គិចជាមួយរូបគេនៅលើផ្លូវមួយក្នុងទីក្រុង Minneapolis តិចជាងបីសប្តាហ៍បន្ទាប់ពីមន្ត្រីអន្តោប្រវេសន៍ម្នាក់បានបាញ់សម្លាប់ស្ត្រីម្នាក់ឈ្មោះ Renee Good ដែលជាម្តាយមានវ័យ៣៧ ឆ្នាំមានកូនបីនាក់ និងជាពលរដ្ឋអាមេរិក៕