ប្រព័ន្ធផ្សព្វផ្សាយអ៊ីស្រាអែលជាច្រើន រាយការណ៍ថា បេសកជនពិសេសសហរដ្ឋអាមេរិក លោក Steve Witkoff បានដាក់សម្ពាធលើអ៊ីស្រាអែលឲ្យបើកឡើងវិញច្រកឆ្លងកាត់ Rafah រវាងតំបន់ហ្កាហ្សា និងប្រទេសអេហ្ស៊ីប ជាផ្នែកនៃផែនការសន្តិភាពគាំទ្រដោយទីក្រុងវ៉ាស៊ីនតោនសម្រាប់តំបន់ហ៊ុមព័ទ្ធមួយនេះ។ អ៊ីស្រាអែលបានបិទច្រកRafah ដែលជាច្រកសម្រាប់ប្រតិបត្តិការជាច្រើន ដូចជាដឹកជញ្ជូនជំនួយសង្គ្រោះចូលទៅក្នុងតំបន់ហ្កាហ្សា និងដឹកអ្នករងរបួសចេញពីតំបន់នោះ។

ការិយាល័យរបស់នាយករដ្ឋមន្ត្រី លោក Benjamin Netanyahu បាននិយាយថា អ៊ីស្រាអែល នឹងបើកឡើងវិញច្រកឆ្លងកាត់Rafah នៅតំបន់ហ្កាហ្សាជាមួយប្រទេសអេហ្ស៊ីប សម្រាប់ការឆ្លងកាត់របស់ប្រជាជនតែប៉ុណ្ណោះ បន្ទាប់ពីប្រតិបត្តិការដើម្បីកំណត់ទីតាំងស្វែងរកសាកសពចំណាប់ថ្នូរអ៊ីស្រាអែលចុងក្រោយដែលនៅសល់នៅក្នុងតំបន់ហ៊ុមព័ទ្ធនោះត្រូវបានបញ្ចប់។

ព្រំដែននេះ ត្រូវបានគេសន្មត់ថាត្រូវបើកក្នុងអំឡុងពេលដំណាក់កាលដំបូងនៃផែនការរបស់ប្រធានាធិបតីសហរដ្ឋអាមេរិក លោក Donald Trump ដើម្បីបញ្ចប់សង្គ្រាម ក្រោមបទឈប់បាញ់ដែលបានឈានដល់ក្នុងខែតុលា រវាងអ៊ីស្រាអែល និងក្រុមហាម៉ាស។ ទោះជាយ៉ាងណា អ៊ីស្រាអែលបានដាក់លក្ខខណ្ឌសម្រាប់ការបើកឡើងវិញលើការវិលត្រឡប់នៃចំណាប់ថ្នូរនៅរស់ទាំងអស់ដែលត្រូវបានឃុំខ្លួនដោយក្រុមសកម្មប្រយុទ្ធប៉ាឡេស្ទីននៅក្នុងតំបន់ហ្កាហ្សា ព្រមទាំង «កិច្ចខិតខំប្រឹងប្រែង១០០ភាគរយ» ដោយក្រុមហាម៉ាស ដើម្បីកំណត់ទីតាំង និងប្រគល់សាកសពចំណាប់ថ្នូរដែលបានស្លាប់ទាំងអស់។ សាកសពទាំងអស់ ត្រូវបានប្រគល់ឲ្យ លើកលែងតែសាកសពរបស់មន្ត្រីនគរបាល លោក Ran Gvili ។ យោធាអ៊ីស្រាអែលបាននិយាយកាលពីថ្ងៃអាទិត្យថា ខ្លួនបានចាប់ផ្តើម «ប្រតិបត្តិការដែលបានកំណត់គោលដៅ» នៅភាគខាងជើងតំបន់ហ្កាហ្សា ដើម្បីយកសាកសពរបស់លោកមកវិញ ខណៈមន្ត្រីយោធាអ៊ីស្រាអែលម្នាក់បាននិយាយថា មាន «តម្រុយស៊ើបការណ៍សម្ងាត់ជាច្រើន» ទាក់ទងនឹងទីតាំងដែលអាចរកឃើញ។