អតិថិជនជាងមួយលាននាក់នៅទូទាំងសហរដ្ឋអាមេរិកគ្មានអគ្គិសនីប្រើប្រាស់ ហើយជើងហោះហើរជាង ១០.០០០វ៉ុលត្រូវបានលុបចោល ខណៈព្យុះរដូវរងាដ៏ខ្លាំងក្លាបានគំរាមកំហែងធ្វើឱ្យផ្នែកដ៏ធំរបស់ប្រទេសជាប់គាំងដោយសារព្រិលធ្លាក់ខ្លាំងនិងមានភ្លៀង។

ការិយាល័យសេវាអាកាសធាតុជាតិ (NWS) បាននិយាយថា ព្យុះនេះត្រូវបានគេព្យាករវាយបោកបក់ភាគខាងកើតពីរភាគបីនៃប្រទេសកាលពីចុងសប្តាហ៍ និងបន្តឈានចូលដល់សប្តាហ៍នេះ ដោយធ្វើឱ្យសីតុណ្ហភាពធ្លាក់ចុះត្រជាក់ដល់កក និងបណ្តាលឱ្យមាន «ផលប៉ះពាល់ដ៏គ្រោះថ្នាក់ដល់ការធ្វើដំណើរ និងហេដ្ឋារចនាសម្ព័ន្ធ» ដែលអូសបន្លាយពេលជាច្រើនថ្ងៃ។ កាលពីថ្ងៃអាទិត្យ អតិថិជនជាង១លាននាក់គ្មានអគ្គិសនីប្រើប្រាស់ ភាគច្រើននៅរដ្ឋ Tennessee ខណៈរដ្ឋ Mississippi រដ្ឋTexas រដ្ឋLouisiana រដ្ឋKentucky រដ្ឋGeorgia រដ្ឋVirginia ហើយរដ្ឋlabama ក៏រងផលប៉ះពាល់ធ្ងន់ធ្ងរផងដែរ។ ព្យុះក៏បានប៉ះពាល់ដល់តំបន់នានាចាប់ពីរដ្ឋ New Mexico រដ្ឋTexas រហូតដល់រដ្ឋ New England។ ដោយហៅព្យុះនេះថា «ជាប្រវត្តិសាស្ត្រ» លោក ប្រធានាធិបតីសហរដ្ឋអាមេរិក Donald Trump បានអនុម័តសេចក្តីប្រកាសគ្រោះមហន្តរាយបន្ទាន់របស់សហព័ន្ធ ខណៈរដ្ឋជិត២០ បានប្រកាសគ្រាអាសន្នអាកាសធាតុ។

លោក Trump បានសរសេរនៅក្នុងសារមួយលើបណ្តាញ Truth Social ថា «យើងនឹងបន្តតាមដាន និងរក្សាទំនាក់ទំនងជាមួយរដ្ឋទាំងអស់សម្រាប់ផ្លូវនៃព្យុះនេះ។

យោងតាមគេហទំព័រតាមដានជើងហោះហើរ FlightAware.com បានឲ្យដឹងថា ជើងហោះហើរជាង ១០.០០០វ៉ុល ត្រូវបានលុបចោលកាលពីថ្ងៃអាទិត្យ និង៨.០០០វ៉ុល ផ្សេងទៀតត្រូវបានពន្យារពេល។ ក្រុមហ៊ុនអាកាសចរណ៍ធំៗរបស់សហរដ្ឋអាមេរិកបានព្រមានដល់អ្នកដំណើរឱ្យប្រុងប្រយ័ត្នចំពោះការផ្លាស់ប្តូរជើងហោះហើរភ្លាមៗ និងការលុបចោល។