ព្រះសីហនុ៖ ដើម្បីបង្កើនទំនាក់ទំនង និងពង្រឹងកិច្ចសហប្រតិបត្ដការ នាវាកងស្វ័យការពារជប៉ុន នឹងចូលចតនៅកំពង់ផែស្វយ័តអន្ដរជាតិក្រុងព្រះសីហនុ ធ្វើទស្សនកិច្ចពីវឌ្ឍនភាពរបស់ខេត្ដព្រះសីហនុ និងផ្លាល់ប្ដូរបទពិសោធន៍ជាមួយកងទ័ពជើងទឹកមូលដ្ឋានសមុទ្ររាម រយៈពេលបីថ្ងៃ ចាប់ពីថ្ងៃទី១៥ ដល់ ថ្ងៃទី១៧ ខែមីនា ឆ្នាំ២០២២។

ដើម្បីអបអរសាទរឱកាសខួបលើកទី៣០ នៃកិច្ចសហប្រតិបត្ដិរក្សាសន្ដិភាព (PKO) រវាងកម្ពុជា និងជប៉ុន នាវាស្វ័យការពារជប៉ុនចំនួនពីរគ្រឿង (JMSDF) ដែលមានឈ្មោះ (URAGA និង HIRADO) ជាមួយកងនាវិកជាង ១០០នាក់ នឹងចូលចតនៅកំពង់ផែស្វយ័តក្រុងព្រះសីហនុ ដើម្បីធ្វើទស្សនកិច្ចពីវឌ្ឍនភាពរបស់ខេត្ដព្រះសីហនុ និងផ្លាស់ប្ដូរបទពិសោធន៍ជាមួយកងទ័ពជើងទឹកកម្ពុជាមូលដ្ឋានសមុទ្ររាម។ នេះ យោងតាមលិខិតជូនដំណឹងបន្ទាន់ ចុះថ្ងៃទី៩ ខែមីនា ឆ្នាំ២០២២ របស់ស្ថានទូតជប៉ុនប្រចាំនៅព្រះរាជាណាចក្រកម្ពុជា បានជម្រាបជូនក្រសួងការបទេស និងកិច្ចសហប្រតិបត្ដិការអន្ដរជាតិកម្ពុជា។

ជាមួយគ្នានោះ នាយនាវីមូលដ្ឋានសមុទ្ររាម បានឱ្យដឹងដែរថា យោងតាមកម្មវិធី គឺនាវាកងស្វ័យការពារជប៉ុន នឹងមកដល់សមុទ្រកម្ពុជា នៅថ្ងៃទី១៤ ខែមីនា ឆ្នាំ២០២២ ដោយមិនទាន់ចូលចតនៅកំពង់ផែស្វយ័តអន្ដរជាតិក្រុ’ព្រះសីហនុនៅឡើយ ព្រោះត្រូវធ្វើចត្ដាឡីស័កសិន (ធ្វើតេស្ដទាំងអស់) នៅថ្ងៃទី១៥ ខែមីនា ឆ្នាំ២០២២ នាយនាវី នាយវីរង និងពលនាវិក ៦០នាក់ នឹងទៅធ្វើបដិសណ្ឋាកិច្ចនាវាកងស្វ័យការពារជប៉ុននៅកំពង់ផែស្វយ័តអន្ដរជាតិក្រុងព្រះសីហនុ ក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ។ នៅថ្ងៃទី១៦ ខែមីនា ឆ្នាំ២០២២ កងនាវិកស្វ័យការពារជប៉ុនចំនួន ០៤រូប នឹងធ្វើដំណើរទស្សនកិច្ចតាមនាវាកងទ័ពជើងទឹកកម្ពុជា ទៅទីបញ្ជាការកងទ័ពជើងទឹកមូលដ្ឋានសមុទ្ររាម ជួបសំណេះសំណាលជាមួយមេបញ្ជាការមូលដ្ឋានសមុទ្ររាម និងធ្វើបទបង្ហាញផ្លាស់ប្ដូរបទពិសោធន៍គ្នាទៅវិញទៅមក រួចហូបអាហារសាមគ្គីថ្ងៃត្រង់នៅមូលដ្ឋានសមុទ្ររាម៕​ អត្ថបទ​ ៖​ ប៊ុនថា