ប្រភពរបស់គណបក្ស នៅថ្ងៃចន្ទ (ទី២៦ ខែមករា ឆ្នាំ២០២៦) នេះ បានប្រាប់សារព័ត៌មាន AFP ថា គណបក្សគាំទ្រយោធាដ៏លេចធ្លោរបស់សហភាពមីយ៉ាន់ម៉ា បានឈ្នះការបោះឆ្នោតដែលរៀបចំដោយរបបយោធា បន្ទាប់ពីមាននូវដំណើរការបោះឆ្នោតរយៈពេល ១ខែ ដែលអ្នកឃ្លាំមើលលទ្ធិប្រជាធិបតេយ្យ បានបដិសេធមិនទទួលយក ដោយចាត់ទុកថា គ្រាន់តែជាការកំណត់ឡើងវិញនូវការគ្រប់គ្រងរបស់កងទ័ពប៉ុណ្ណោះ។

បើទោះបីជាយោធាបានបញ្ជាក់ថា ការបោះឆ្នោតនេះនឹងប្រគល់អំណាចទៅឲ្យប្រជាជនវិញក៏ដោយ ក៏មេដឹកនាំប្រជាធិបតេយ្យដ៏មានប្រជាប្រិយភាព លោកស្រី អ៊ុងសាន ស៊ូជី (Aung San Suu Kyi) នៅតែត្រូវបានឃុំខ្លួន តាំងពីរដ្ឋប្រហារ ហើយគណបក្សរបស់លោកស្រីត្រូវបានរំលាយ ខណៈដែលអ្នករិះគន់ លើកឡើងថា សន្លឹកឆ្នោតមានពេញទៅដោយសម្ព័ន្ធមិត្តយោធា។

ដោយបាននិយាយក្នុងលក្ខខណ្ឌមិនបញ្ចេញឈ្មោះ ពីព្រោះពួកគេមិនត្រូវបានអនុញ្ញាតឲ្យចែករំលែកលទ្ធផលបឋម មន្ត្រីជាន់ខ្ពស់ម្នាក់មកពីគណបក្សសាមគ្គីភាពសហភាព និងអភិវឌ្ឍន៍ (USDP) បានបង្ហើបឲ្យដឹងថា «យើងបានឈ្នះសំឡេងភាគច្រើនរួចហើយ» ។

ពួកគេបានបញ្ជាក់ថា៖ «យើងស្ថិតក្នុងការមានសិទ្ធិអំណាចបង្កើតរដ្ឋាភិបាលថ្មី បន្ទាប់ពីដំណាក់កាលទី៣ និងចុងក្រោយនៃការបោះឆ្នោត បានកើតឡើងកាលពីថ្ងៃទី២៥ ខែមករា។ ដោយសារយើងបានឈ្នះការបោះឆ្នោត យើងនឹងបន្តទៅមុខ»។

អ្នកវិភាគជាច្រើន ពណ៌នាអំពីគណបក្ស USDP ថា ជាតំណាងស៊ីវិលរបស់យោធាដែលបានដណ្តើមអំណាច ក្នុងរដ្ឋប្រហារឆ្នាំ២០២១ ដោយផ្តួលរំលំរដ្ឋាភិបាលប្រជាធិបតេយ្យរបស់លោកស្រី ស៊ូជី។

ការបោះឆ្នោតមិនត្រូវបានធ្វើឡើងនៅក្នុងតំបន់ធំៗរបស់ប្រទេសគ្រប់គ្រងដោយក្រុមឧទ្ទាម ដែលកំពុងប្រយុទ្ធគ្នាជាមួយរបបយោធា ក្នុងសង្គ្រាមស៊ីវិលបង្កឡើងដោយរដ្ឋប្រហារនោះទេ ជាឧបសគ្គមួយទៀតដែលត្រូវបានលើកឡើងដោយអ្នកដែលចោទសួរអំពីអាណត្តិនៃការបោះឆ្នោតនេះ។ លទ្ធផលផ្លូវការត្រូវបានគេរំពឹងថា នឹងត្រូវបានប្រកាសនៅប៉ុន្មានថ្ងៃខាងមុខក្នុងសប្តាហ៍នេះ៕