ប្រព័ន្ធផ្សព្វផ្សាយសហរដ្ឋអាមេរិក USA Today បានរាយការណ៍ថា មនុស្សយ៉ាងតិច ១៣នាក់បានស្លាប់ និងមនុស្សជិត ១លាននាក់ ពុំមានអគ្គិសនីប្រើប្រាស់នោះទេកាលពីថ្ងៃអាទិត្យ ទី២៥ ខែមករា ខណៈព្យុះរដូវរងាដ៏ខ្លាំងក្លាមួយ បានបន្តដំណើរដ៏បំផ្លិចបំផ្លាញរបស់ខ្លួនទូទាំងសហរដ្ឋអាមេរិក ដោយនាំមកនូវសំណុំទឹកកក ព្រិល និងភ្លៀងយ៉ាងត្រជាក់ ដែលធ្វើឱ្យបណ្ដាញខ្សែភ្លើង និងដើមឈើដួលរលំ។

ចលាចលផ្លូវអាកាសទ្រង់ទ្រាយធំត្រូវបានរាយការណ៍ ដោយមានជើងហោះហើរជាង ១១.០០០ជើង ត្រូវបានលុបចោល នេះបើយោងតាមរបាយការណ៍របស់គេហទំព័រតាមដានជើងហោះហើរ FlightAware ហើយការិយាល័យ និងសាលារៀននានា ត្រូវបានបិទដំណើរការរហូតដល់ថ្ងៃចន្ទ ទី២៦ ខែមករា នេះ។

ដោយសារការដាច់ចរន្តអគ្គិសនីទូទាំងភាគខាងកើតសហរដ្ឋអាមេរិក ក្រុមអ្នកឧតុនិយមនិងមន្ត្រីគ្រប់គ្រងគ្រាអាសន្ន កំពុងព្រួយបារម្ភកាន់តែខ្លាំងឡើងអំពីភាពត្រជាក់ខ្លាំង ដែលកំពុងរំកិលចូលនៅថ្ងៃចន្ទ ក្រោយពេលព្យុះរដូវរងាកន្លងផុតទៅ។ ព្យុះដ៏ធំសម្បើមនេះបានរំកិលទៅក្នុងតំបន់អាត្លង់ទិកភាគកណ្តាល កាលពីយប់ថ្ងៃអាទិត្យ ហើយបានបន្តដំណើរចូលទៅភាគឦសានសហរដ្ឋអាមេរិក។

មន្រ្តីមកពីសេវាអាកាសធាតុជាតិ បាននិយាយថា មនុស្សយ៉ាងហោចណាស់ ១៥០លាននាក់ នៅតែស្ថិតនៅក្រោមការព្រមានអំពីភ្លៀងរដូវរងា និងការព្រមានអំពីគ្រោះថ្នាក់នៃភាពត្រជាក់នេះ។ ខណៈដែលព្រិលនិងទឹកកកបន្តធ្លាក់ចុះ ហើយសីតុណ្ហភាពត្រជាក់ខ្លាំងកំពុងរំកិលមកជាបន្តបន្ទាប់ សេវាអាកាសធាតុ និងមន្ត្រីសហព័ន្ធ រដ្ឋ និងមូលដ្ឋានផ្សេងទៀត កំពុងជំរុញកុំឱ្យប្រជាជនធ្វើដំណើរ ប្រសិនបើមិនចាំបាច់ ដើម្បីជៀសវាងគ្រោះថ្នាក់៕