ចំនួនអ្នកស្លាប់ដោយសារគ្រោះបំណាក់ដី ដែលបានវាយប្រហារខេត្ត ជ្វាខាងលិច នៃប្រទេសឥណ្ឌូនេស៊ី កាលពីចុងសប្តាហ៍កន្លងទៅ បានកើនឡើងដល់ ១៧ នាក់ នៅថ្ងៃចន្ទ (២៦ មករា) នេះ ខណៈមនុស្សរាប់សិបនាក់នៅតែបាត់ខ្លួន។

បំណាក់ដីដែលបានវាយប្រហារតំបន់លំនៅដ្ឋានមួយកន្លែងក្នុងតំបន់ បានឌុងបារ៉ាត នៅព្រឹកថ្ងៃសៅរ៍ចុងសប្ដាហ៍មុន ត្រូវបានបង្កឡើងដោយភ្លៀងធ្លាក់ខ្លាំង ដែលចាប់ផ្តើមនៅថ្ងៃសុក្រមុននោះ ហើយទីភ្នាក់ងារអាកាសធាតុបានព្រមានថា ភ្លៀងអាចនឹងបន្តធ្លាក់នៅក្នុងខេត្តនេះ និងតំបន់ជាច្រើន សម្រាប់រយៈពេល ១សប្តាហ៍ទៀត។

ភូមិ Pasir Langu ដែលរងផលប៉ះពាល់ដោយគ្រោះបំណាក់ដីនេះ មានទីតាំងស្ថិតនៅក្នុងតំបន់ភ្នំមួយ ក្នុងខេត្ត ជ្វាខាងលិច ដែលមានចម្ងាយប្រហែល ១០០គីឡូម៉ែត្រ ភាគអាគ្នេយ៍នៃរដ្ឋធានីហ្សាកាតា របស់ប្រទេសឥណ្ឌូនេស៊ី។

ទីភ្នាក់ងារអាកាសធាតុបាននិយាយថា ផ្ទះសម្បែងជាង ៣០ខ្នង ត្រូវបានកប់ក្នុងបំណាក់ដី។ អ្នកនាំពាក្យទីភ្នាក់ងារ លោក Abdul Muhari បាននិយាយនៅថ្ងៃចន្ទថា យ៉ាងហោចណាស់មានមនុស្ស ១៧នាក់ បានស្លាប់ ដោយសារគ្រោះធម្មជាតិមួយនេះ ហើយមនុស្ស ៧៣នាក់ នៅតែបាត់ខ្លួន។ គួររម្លឹកថា បំណាក់ដីនេះបានកើតឡើងរយៈពេលពីរខែប៉ុណ្ណោះ បន្ទាប់ពីទឹកជំនន់ និងបំណាក់ដីដែលបង្កឡើងដោយព្យុះស៊ីក្លូននៅលើកោះ ស៊ូម៉ាត្រា បានសម្លាប់មនុស្ស ១.២០០ នាក់ បំផ្លាញផ្ទះសម្បែង និងបានជម្លៀសប្រជាជនជាង ១លាននាក់៕