ទីភ្នាក់ងារសារព័ត៌មានផ្លូវការ Xinhua នៅថ្ងៃចន្ទ (ទី២៦ ខែមករា ឆ្នាំ២០២៦) នេះ បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បានបញ្ជាក់ថា ប្រទេសចិន និងឥណ្ឌា គឺជា «អ្នកជិតខាង មិត្តភក្តិ និងដៃគូដ៏ល្អ» ខណៈដែលលោកបានអបអរសាទរសមភាគីឥណ្ឌារបស់លោក គឺលោកស្រី Droupadi Murmu នៅថ្ងៃបុណ្យសាធារណរដ្ឋរបស់ប្រទេសអាស៊ីខាងត្បូង។

បើយោងតាមសារព័ត៌មាន Xinhua បានឲ្យដឹងថា លោក ស៊ី បានមានប្រសាសន៍ថា ក្នុងរយៈពេលមួយឆ្នាំកន្លងមកនេះ ទំនាក់ទំនងចិន-ឥណ្ឌា បានបន្តប្រសើរឡើង និងលូតលាស់ ហើយមានសារៈសំខាន់យ៉ាងខ្លាំង ក្នុងការរក្សា និងលើកកម្ពស់សន្តិភាព និងវិបុលភាពរបស់ពិភពលោក»។

លោក ស៊ី បានបន្តថា ប្រទេសចិនតែងតែជឿថា ការធ្វើជា «អ្នកជិតខាង មិត្តភក្តិ និងដៃគូដ៏ល្អ» គឺជាជម្រើសដ៏ត្រឹមត្រូវ សម្រាប់ទាំងចិន និងឥណ្ឌា។ ហើយបើយោងតាមសារព័ត៌មាន Xinhua បានដឹងទៀតថា លោកបានសំដៅទៅលើចិន និងឥណ្ឌាថា ជា «នាគ និងដំរីដែលកំពុងរាំរែកជាមួយគ្នា»។

មេដឹកនាំចិនបានសង្កត់ធ្ងន់ថា លោកសង្ឃឹមថា ភាគីទាំង២ នឹងពង្រីកការផ្លាស់ប្តូរ និងកិច្ចសហប្រតិបត្តិការ និងដោះស្រាយកង្វល់របស់គ្នាទៅវិញទៅមក ដើម្បីលើកកម្ពស់ទំនាក់ទំនងដ៏ល្អប្រសើរ និងស្ថិរភាព។

គួរបញ្ជាក់ថា ប្រទេសជិតខាងអាស៊ីទាំង២ ដែលប្រដាប់ដោយអាវុធនុយក្លេអ៊ែរ មានព្រំដែនរួមប្រវែង ៣.៨០០គីឡូម៉ែត្រ ដែលមិនទាន់បានកំណត់ឲ្យបានច្បាស់លាស់ និងកើតជម្លោះជាមួយគ្នា ចាប់តាំងពីទសវត្សរ៍ឆ្នាំ១៩៥០។ ចំណងមិត្តភាព រវាងប្រទេសទាំង២ ត្រូវបានរង្គោះរង្គើដោយការប៉ះទង្គិចគ្នា នៅឆ្នាំ២០២០ ដែលទាហានឥណ្ឌា ២០នាក់ និងទាហានចិន ៤នាក់ បានបាត់បង់ជីវិត នៅក្នុងការប្រយុទ្ធគ្នាដោយដៃទទេ។

តែយ៉ាងណាក្ដី ប្រទេសទាំង២ បានចាប់ផ្តើមធ្វើឲ្យទំនាក់ទំនងប្រសើរឡើងវិញ នៅឆ្នាំ២០២៤ បន្ទាប់ពីបានធ្វើនូវដំណើរទស្សនកិច្ចទ្វេភាគីកម្រិតខ្ពស់ជាបន្តបន្ទាប់៕