កាលពីថ្ងៃអាទិត្យ សមាជិកសភាអ៊ីរ៉ង់បានថ្កោលទោសយ៉ាងដាច់អហង្ការចំពោះសេចក្តីសម្រេច«ជ្រៀតជ្រែក» ប្រឆាំងអ៊ីរ៉ង់ដែលសភាអឺរ៉ុបបានអនុម័តថ្មីៗនេះ។

នៅក្នុងសេចក្តីសម្រេចដែលបានអនុម័តកាលពីថ្ងៃព្រហស្បតិ៍ សភាអឺរ៉ុបបានចោទប្រកាន់រដ្ឋាភិបាលអ៊ីរ៉ង់ពីបទរំលោភសិទ្ធិមនុស្ស ក្នុងអំឡុងពេលមានភាពចលាចលថ្មីៗនេះ នៅក្នុងប្រទេសនេះ ហើយបានអំពាវនាវឲ្យមានចាត់ទុកកងឆ្មាំបដិវត្តន៍ឥស្លាម (IRGC) ជាអង្គការភេរវកម្ម។

នៅក្នុងសេចក្តីថ្លែងការណ៍មួយ សមាជិកសភាអ៊ីរ៉ង់បានពិពណ៌នាសេចក្តីសម្រេចនេះថា ជា «ឧទាហរណ៍ច្បាស់លាស់នៃការជ្រៀតជ្រែក» នៅក្នុងកិច្ចការផ្ទៃក្នុងរបស់អ៊ីរ៉ង់ ដោយបន្ថែមថា ការអនុម័តសេចក្តីសម្រេចនេះ មានគោលបំណងបិទបាំងការបរាជ័យរបស់សភាអឺរ៉ុប ក្នុងការដោះស្រាយបញ្ហាផ្ទៃក្នុងរបស់សហភាពអឺរ៉ុប។

សេចក្តីថ្លែងការណ៍បានកត់សម្គាល់ថា មានភស្តុតាងដែលអាចទុកចិត្តបានដែលបង្ហាញថា ក្រុម «ភេរវករ» ដែលញុះញង់ឲ្យមានកុបកម្មនៅក្នុងប្រទេសអ៊ីរ៉ង់ មានទំនាក់ទំនង «ដោយផ្ទាល់ និងរៀបចំ» ជាមួយសេវាស៊ើបការណ៍សម្ងាត់របស់ប្រទេសមួយចំនួន ដែលដឹកនាំនិងគាំទ្រការសម្លាប់ជនជាតិអ៊ីរ៉ង់ នៅក្នុងភាព      ចលាចល។

សមាជិកសភាអ៊ីរ៉ង់បានសង្កត់ធ្ងន់ថា សភាអឺរ៉ុប និងរដ្ឋាភិបាលអឺរ៉ុបដែល «ជ្រៀតជ្រែក»ក្នុងកិច្ចការរបស់ទីក្រុងតេអេរ៉ង់ មានការទទួលខុសត្រូវផ្នែកច្បាប់ដោយផ្ទាល់ និងនយោបាយចំពោះការគាំទ្រ និងសម្របសម្រួលសកម្មភាព «ភេរវកម្ម» ប្រឆាំងនឹងអ៊ីរ៉ង់ ហើយត្រូវតែទទួលខុសត្រូវ៕