នាវាដឹកប្រេងមួយគ្រឿងដែលត្រូវបានរឹបអូសដោយប្រទេសបារាំងនៅសមុទ្រមេឌីទែរ៉ាណេ និងសង្ស័យថាជាផ្នែកមួយនៃ «កងនាវាស្រមោល» ដែលបំពានទណ្ឌកម្មរបស់រុស្ស៊ី កាលពីថ្ងៃអាទិត្យ បានចតនៅ នៅជិតកំពង់ផែភាគខាងត្បូងនៃប្រទេសបារាំង និងត្រូវបានការពារដោយកងទ័ពជើងទឹកបារាំង។

នាវា Grinch ត្រូវបានស្ទាក់ចាប់កាលពីព្រឹកថ្ងៃព្រហស្បតិ៍ នៅក្នុងដែនទឹកអន្តរជាតិរវាងប្រទេសអេស្ប៉ាញ និងអាហ្វ្រិកខាងជើង។

អាជ្ញាធរសមុទ្រក្នុងតំបន់ បាននិយាយក្នុងសេចក្តីថ្លែងការណ៍មួយកាលពីថ្ងៃសៅរ៍ថា កងទ័ពជើងទឹកបារាំងបានអមដំណើរនាវានោះ ទៅកាន់ឈូងសមុទ្រ Fos នៅភាគខាងត្បូងប្រទេសបារាំង។

អាជ្ញាធរបានបន្ថែមថា នាវានេះ នឹងត្រូវបានរក្សាទុកនៅក្នុងដំណាក់កាលស៊ើបអង្កេតបឋមរបស់រដ្ឋអាជ្ញាសាធារណៈទីក្រុង Marseille ជុំវិញការខកខានមិនបានដាក់ទង់ជាតិ។ យោងតាមប្រភពមួយដែលដឹងអំពី ករណីនេះ ប្រធានក្រុមនាវា និងក្រុមនាវិកក៏ នឹងត្រូវបានសួរចម្លើយផងដែរ។

អ្នកថតរូប AFP ម្នាក់ បានសង្កេតឃើញនាវាដឹកប្រេងនេះ នៅចម្ងាយប្រហែល ៥០០ ម៉ែត្រពីទីក្រុង Martigues។ នាវាកងទ័ពជើងទឹកបារាំងមួយគ្រឿង និងទូកពីរគ្រឿងរបស់កងល្បាត បានប្រចាំការនៅក្បែរនោះ។

អាជ្ញាធរសមុទ្រ បាននិយាយថា តំបន់ហាមឃាត់ផ្លូវទឹក និងផ្លូវអាកាស ត្រូវបានបង្កើតឡើង នៅជុំវិញកន្លែងចតនោះ។

នាវាប្រហែល ៥៩៨គ្រឿង ដែលសង្ស័យថា ជារបស់កងនាវាស្រមោលនេះ កំពុងរងការដាក់ទណ្ឌកម្មរបស់សហភាពអឺរ៉ុប៕