យោធាស៊ីរី បាននិយាយកាលពីថ្ងៃអាទិត្យថា ខ្លួនបានបើកច្រករបៀងមនុស្សធម៌មួយទៅកាន់ទីក្រុង Kobani មានជនជាតិឃើដភាគច្រើនរស់នៅ ដែលពោរពេញទៅដោយជនភៀសខ្លួន ខណៈដែលក្បួនរថយន្តរបស់អង្គការសហប្រជាជាតិដែលដឹកជំនួយសង្គ្រោះជីវិត បានធ្វើដំណើរទៅកាន់ទីនោះ។

ការបើកច្រករបៀងជំនួយនេះ បានកើតឡើង នៅពេលដែលក្រសួងការពារជាតិ បានប្រកាសពីការបន្តបទឈប់បាញ់រយៈពេល ១៥ថ្ងៃ នៅទូទាំងគ្រប់សមរភូមិនៃកងទ័ពអារ៉ាប់ស៊ីរី ដែលមានប្រសិទ្ធភាព នៅម៉ោង ១១ យប់ថ្ងៃទី ២៤ ខែមករា។

ក្រសួងបាននិយាយថា ការបន្តបទឈប់បាញ់នេះ ធ្វើឡើង ដើម្បីគាំទ្រដល់ប្រតិបត្តិការរបស់សហរដ្ឋអាមេរិកក្នុងការបញ្ជូនអ្នកជាប់ឃុំឃាំងរដ្ឋអ៊ីស្លាម Daesh ពីពន្ធនាគារនៅក្នុងប្រទេសស៊ីរី ទៅកាន់អ៊ីរ៉ាក់។

ទីបញ្ជាការប្រតិបត្តិការនៃកងទ័ពអារ៉ាប់ស៊ីរី បានព្រមានកងកម្លាំងប្រជាធិបតេយ្យស៊ីរី និងកងជីវពលនៃគណបក្សពលករឃើដ (PKK) អំពីការបន្តការរំលោភបំពាន និងការបង្កហេតុរបស់ពួកគេ។

ទីបញ្ជាការប្រតិបត្តិការនេះ ក៏បានប្រកាសពីការបើកច្រករបៀងមនុស្សធម៌ចំនួនពីរ គឺមួយទៅកាន់ទីក្រុង Kobani និងមួយទៀត នៅក្នុងខេត្ត Hasakah ក្បែរនោះ ដើម្បីអនុញ្ញាតឲ្យ «ជំនួយចូល»។

លោក Gonzalo Vargas Llosa តំណាងទីភ្នាក់ងារជនភៀសខ្លួនរបស់អង្គការសហប្រជាជាតិប្រចាំប្រទេសស៊ីរី បាននិយាយនៅលើគេហទំព័រ X ថា៖«ដោយសារមានកិច្ចសហប្រតិបត្តិការជាមួយរដ្ឋាភិបាលស៊ីរី…ក្បួនរថយន្តដឹកទំនិញចំនួន ២៤គ្រឿង ដែលដឹកអាហារចាំបាច់ សម្ភារៈសង្គ្រោះ និងប្រេងម៉ាស៊ូត» បានចេញដំណើរទៅកាន់ទីក្រុង Kobani «ដើម្បីផ្តល់ជំនួយសង្គ្រោះជីវិត និងជំនួយរដូវរងាដល់ជនស៊ីវិលដែលរងផលប៉ះពាល់ដោយអរិភាពនេះ»៕