អតីតប្រធានាធិបតីអាមេរិក លោក Barack Obama និងលោក Bill Clinton បានចេញការអំពាវនាវចំៗឲ្យពលរដ្ឋអាមេរិកក្រោកឡើង ហើយការពារតម្លៃរបស់ខ្លួន បន្ទាប់ពីមានការសម្លាប់ពលរដ្ឋម្នាក់ទៀត នៅទីក្រុង Minneapolis ដោយទីភ្នាក់ងារអន្តោប្រវេសន៍ ដែលប្រធានាធិបតី Donald Trump បានចោទថា មកពី «ភាពវឹកវរ» បង្កឡើងដោយគណបក្សប្រជាធិបតេយ្យ។

រដ្ឋបាលរបស់លោក Trump បានប្រឈមនឹងសម្ពាធកាន់តែខ្លាំងឡើងៗ ជុំវិញការបង្ក្រាបអន្តោប្រវេសន៍ទ្រង់ទ្រាយធំរបស់ខ្លួន ជាពិសេសបន្ទាប់ពីភ្នាក់ងារសហព័ន្ធ បានបាញ់សម្លាប់លោក Alex Pretti អាយុ ៣៧ឆ្នាំ ដែលជាគិលានុបដ្ឋាកផ្នែក ICU (បន្ទប់សង្គ្រោះបន្ទាន់) កាលពីថ្ងៃទី២៤ ខែមករា ខណៈពេលកំពុងប៉ះទង្គិចជាមួយលោកនៅលើផ្លូវព្រិលទឹកកក។

ហេតុការណ៍នោះបានកើតឡើងមិនដល់ ៣សប្តាហ៍ផង បន្ទាប់ពីមន្ត្រីអន្តោប្រវេសន៍ម្នាក់ បានបាញ់ទៅលើស្ត្រីម្នាក់ឈ្មោះ Renee Good វ័យ ៣៧ឆ្នាំដូចគ្នដែរ រហូតបណ្តាលឲ្យនាងស្លាប់នៅក្នុងរថយន្តរបស់នាងនៅក្នុងទីក្រុងដដែលនេះ នៅតំបន់កណ្ដាលភាគខាងលិច។ សោកនាដកម្មទាំង ២លើក បានបង្កឲ្យមានការខឹងសម្បាយ៉ាងខ្លាំង ក្នុងនោះរួមទាំងពីសំណាក់អ្នកកាន់តំណែងមុនលោក Trump គឺអតីតប្រធានាធិបតី ២រូប មកពីគណបក្សប្រជាធិបតេយ្យផងដែរ។

កាលពីថ្ងៃទី២៥ ខែមករា នៅក្នុងសេចក្តីថ្លែងការណ៍មួយ លោក Obama និងអតីតស្ត្រីទី១ លោកស្រី Michelle Obama បានលើកឡើងថា ការបាញ់ប្រហារលើលោក Pretti គួរតែជា «ការដាស់តឿន» ថា តម្លៃស្នូលរបស់សហរដ្ឋអាមេរិក «កំពុងរងការវាយប្រហារកាន់តែខ្លាំងឡើងៗ»។

ហើយប៉ុន្មានម៉ោងក្រោយមក លោក Clinton បានធ្វើការចោទប្រកាន់យ៉ាងខ្លាំងក្លាទៅលើរដ្ឋបាលបច្ចុប្បន្ន ដោយនិយាយថា ក្រុមអ្នកតវ៉ា ដោយសន្តិវិធី «ត្រូវបានចាប់ខ្លួន វាយដំ ប្រើឧស្ម័នបង្ហូរទឹកភ្នែក ហើយធ្ងន់ធ្ងរបំផុត គឺករណីរបស់ស្ត្រី Renee Good និងលោក Alex Pretti ដែលត្រូវបានបាញ់សម្លាប់»។ លោកបានសង្កត់ធ្ងន់នៅក្នុងសេចក្តីថ្លែងការណ៍មួយថា «រឿងទាំងអស់នេះមិនអាចទទួលយកបានទេ» ខណៈដែលលោកបានជំរុញឲ្យពលរដ្ឋអាមេរិក «ក្រោកឈរឡើង ហើយនិយាយចេញមក»។ លោកបានបញ្ជាក់បន្ថែមថា៖ «ប្រសិនបើយើងបណ្ដោយឲ្យសេរីភាពរបស់យើងបាត់បង់ ក្រោយ ២៥០ឆ្នាំ យើងប្រហែលជាមិនអាចយកវាមកវិញបានទេ»៕