បាត់ដំបង៖ អាជ្ញាធរខេត្តបាត់ដំបង បានរកឃើញកន្លែងសមគួរហើយ សម្រាប់ធ្វើការបូជា និងបញ្ចុះសព ក្នុងករណីដែលពលរដ្ឋណា បាត់បង់ជីវិតដោយសារជំងឺកូវីដ១៩ គឺមានចំនួន ០២កន្លែង ដែលស្ថិតក្នុងស្រុករតនមណ្ឌល។
លោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង បានឲ្យដឹងនៅល្ងាចថ្ងៃទី១៦ ខែមីនា ឆ្នាំ២០២១ថា ការជ្រើសរើសទីតាំងបូជាសពរហូតដល់ ០២កន្លែងនេះ គឺមួយកន្លែងធ្វើជាមច្ឆាសម្រាប់មានករណីពលរដ្ឋខ្មែរទូទៅស្លាប់ដោយសារជំងឺកូវីដ១៩ និងមួយកន្លែងទៀត សម្រាប់បញ្ចុះសពរបស់ពលរដ្ឋខ្មែរឥស្លាម ដែលបានស្លាប់ដោយសារជំងឺដូចគ្នានេះ ហើយទីតាំងទាំងពីរនេះ គឺនៅឆ្ងាយពីគ្នា ប៉ុន្តែស្ថិតក្នុងស្រុកតែមួយ ។
លោកបានបន្តថា សម្រាប់ដីទុកបញ្ចុះសពពលរដ្ឋខ្មែរឥស្លាម ក្នុងទំហំដីក្បាល ២០ម៉ែត្រ និងបណ្ដោយ ៥០ម៉ែត្រ ហើយសម្រាប់មច្ឆាវិញ គឺទុកឲ្យខាងមន្ទីរធម្មការ និងសាសនា មន្ទីរវប្បធម៌ និងវិចិត្រសិល្បៈជាអ្នករៀបចំ ប៉ុន្តែមច្ឆានេះ ត្រូវមានសភាពខុសប្លែកពីមច្ឆាតាមវត្តធម្មតា ព្រោះត្រូវបូជាសពរបស់អ្នកស្លាប់ដោយជំងឺកូវីដ១៩។
លោក សឿម ប៊ុនរិទ្ធ បានបន្ថែមថា ចំពោះទីតាំងបូជាសព ឬបញ្ចុះសពទាំងពីរកន្លែងនេះ បើបញ្ហាជំងឺកូវីដ១៩ មានការផុតរលត់ទៅ គឺទុកសម្រាប់បូជា និងបញ្ចុះសពពលរដ្ឋស្លាប់ជាទូទៅ ជាររៀងរហូត មិនមានការផ្លាស់ប្តូរធ្វើអ្វីផ្សេងនោះទេ។
នៅក្នុងខេត្តបាត់ដំបង មានអ្នកឆ្លងជំងឺកូវីដ១៩ម្នាក់ ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ បើតាមការបញ្ជាក់របស់លោកអភិបាលរងថា សភាពរបស់អ្នកជំងឺគឺធម្មតា មិនមានអ្វីធ្ងន់ធ្ងរនោះទេ ហើយអ្នកជំងឺកូវីដ១៩នោះ កំពុងសម្រាក់ព្យាបាលក្នុងមន្ទីរពេទ្យបង្អែកខេត្ត។
ក្នុងពេលចុះពិនិត្យមើលកន្លែងបូជា នៅថ្ងៃទី១៦ ខែមិនា ឯកឧត្តម ងួន រតនៈ អភិបាលខេត្តបាត់ដំបង បានណែនាំដល់មន្ត្រីជំនាញ ត្រូវរៀបចំទីតាំងទាំងពីរនោះ ឲ្យបានសមស្រប និងមិនមានប៉ះពាល់ដល់ការរស់នៅរបស់ពលរដ្ឋ។
សូមបញ្ជាក់ថា ពលករកំពុងធ្វើចត្តាឡីស័តាមមណ្ឌលក្នុងខេត្តបាត់ដំបងមានចំនួនសរុប ២៣១៥នាក់ ហើយបានកំណត់មុខសញ្ញាពាក់ព័ន្ធក្នុងងព្រឹត្តិការណ៍សហគមន៍ ២០កុម្ភៈ ចំនួន ៧៨នាក់ យកចំណាក ៧៨នាក់ អវិជ្ជាមាន ៧៧នាក់ លទ្ធផលវិជ្ជា ១នាក់ ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
