អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានជាការឆ្លើយតបទៅនឹងសំណួរមួយពីសារព័ត៌មាន TASSថា រុស្ស៊ីកំពុងបន្តទំនាក់ទំនងការទូតជាមួយវ៉េណេស៊ុយអេឡា ហើយការអភិវឌ្ឍទំនាក់ទំនងជាមួយមូស្គូ គឺជាអាទិភាពសម្រាប់ទីក្រុងការ៉ាកាស។  

លោកបាននិយាយថា៖«យើងទាក់ទងជាមួយថ្នាក់ដឹកនាំវ៉េណេស៊ុយអេឡាជារៀងរាល់ថ្ងៃ តាំងពីដើមដំបូងមកម្ល៉េះ»។ «យើងរក្សាទំនាក់ទំនងយ៉ាងរឹងមាំតាមរយៈបណ្តាញការទូត»។

លោកបានបន្ថែមថា៖«យើងមានទំនាក់ទំនងទ្វេភាគីដាច់ដោយឡែករបស់យើង គម្រោងមួយចំនួនដែលយើងចាប់អារម្មណ៍ក្នុងការបន្ត និងការវិនិយោគរបស់យើង នៅក្នុងប្រទេសវ៉េណេស៊ុយអេឡា  ហើយដោយវិនិច្ឆ័យតាមរយៈអ្វីដែលយើងត្រូវបានគេប្រាប់នៅក្នុងទីក្រុងការ៉ាកាស សម្រាប់ប្រទេសនេះ ការរក្សាចំណងមិត្តភាពដែលផ្តល់ផលប្រយោជន៍ទៅវិញទៅមកជាមួយរុស្ស៊ី គឺជាអាទិភាពមួយរបស់ពួកគេ»។

លោក Peskov បាននិយាយអំពីប្រធានាធិបតីដែលមានសិទ្ធិអំណាចរបស់វ៉េណេស៊ុយអេឡា គឺលោកស្រី Delcy Rodriguez ថា៖«យើងស្គាល់លោកស្រីច្បាស់ណាស់»។

លោកស្រី Rodriguez បានស្បថចូលកាន់តំណែងជាមេដឹកនាំរបស់ប្រទេសវ៉េណេស៊ុយអេឡា បន្ទាប់ពីយោធាអាមេរិក បានទម្លាក់លោកប្រធានាធិបតី នីកូឡាស ម៉ាឌូរ៉ូ ចេញពីតំណែង នៅក្នុងប្រតិបត្តិការមួយនៅទីក្រុងការ៉ាកាស។ លោក ម៉ាឌូរ៉ូ និងភរិយារបស់លោក គឺលោកស្រី Cilia Flores ត្រូវបានចាប់ខ្លួនដោយសហរដ្ឋអាមេរិក បន្ទាប់ពីការវាយឆ្មក់ និងប្រឈមនឹងការចោទប្រកាន់ជាច្រើនករណី នៅទីក្រុងញូវយ៉ក៕