ចៅក្រម នៅថ្ងៃចន្ទ (ទី២៦ ខែមករា ឆ្នាំ២០២៦) នេះ បានសម្រេចថា អតីតប្រធានាធិបតីហ្វីលីពីន លោក Rodrigo Duterte នឹងឡើងប្រឈមនឹងការសវនាការ នៅតុលាការព្រហ្មទណ្ឌអន្តរជាតិ (ICC) នាខែក្រោយ ដោយបដិសេធអំណះអំណាង ដែលថា បុរសអាយុ ៨០ឆ្នាំរូបនេះ មិនមានសុខភាពល្អគ្រប់គ្រាន់អាចចូលរួមដំណើរការនេះបាន។

លោក Duterte នឹងប្រឈមជាមួយការសវនាការ ជាអ្វីដែលគេហៅថា «ការបញ្ជាក់ការចោទប្រកាន់» ដែលចាប់ផ្តើមនៅថ្ងៃទី២៣ ខែកុម្ភៈ ជាពេលដែលចៅក្រមនឹងសម្រេចថា តើការចោទប្រកាន់របស់រដ្ឋអាជ្ញា មានបន្ទុករឹងមាំគ្រប់គ្រាន់ ដើម្បីបន្តការកាត់ក្តីពេញលេញដែរ ឬអត់។

គួរបញ្ជាក់ថា រដ្ឋអាជ្ញារបស់ ICC បានចោទប្រកាន់លោក Duterte ពីបទឧក្រិដ្ឋកម្មប្រឆាំងនឹងមនុស្សជាតិចំនួន ៣ករណី ដោយចោទប្រកាន់ថា លោកមានជាប់ពាក់ព័ន្ធក្នុងឃាតកម្មយ៉ាងហោចណាស់ ៧៦ករណី ដែលជាផ្នែកនៃ «សង្គ្រាមប្រឆាំងគ្រឿងញៀន» របស់លោក៕