ចិន នៅថ្ងៃចន្ទ (ទី២៦ ខែមករា ឆ្នាំ២០២៦) នេះ បានប្រាប់ពលរដ្ឋរបស់ខ្លួនកុំឲ្យធ្វើដំណើរទៅលេងប្រទេសជប៉ុន អំឡុងបុណ្យចូលឆ្នាំថ្មីប្រពៃណីចិន ដែលជាថ្ងៃឈប់សម្រាកសាធារណៈដ៏យូរបំផុតរបស់ប្រទេស ខណៈដែលទីក្រុងប៉េកាំង មិនបានបង្ហាញសញ្ញាពីការថយចុះនោះឡើយ សម្រាប់កំហឹង ចំពោះការអត្ថាធិប្បាយដែលនាយករដ្ឋមន្ត្រីជប៉ុន លោក Sanae Takaichi បានធ្វើឡើងនៅដើមខែវិច្ឆិកាឆ្នាំមុន ជុំវិញបញ្ហាកោះតៃវ៉ាន់ដែលគ្រប់គ្រងដោយលទ្ធិប្រជាធិបតេយ្យ។

ដោយលើកឡើងពី «ការកើនឡើងនូវឧក្រិដ្ឋកម្មដែលកំណត់គោលដៅលើពលរដ្ឋចិន» និងព្រឹត្តិការណ៍រញ្ជួយដី ក្រសួងការបរទេសចិន បានប្រាប់ថា ពលរដ្ឋ «ប្រឈមនឹងការគំរាមកំហែងសន្តិសុខធ្ងន់ធ្ងរ នៅក្នុងប្រទេសជប៉ុន។ នេះបើយោងតាមសេចក្តីថ្លែងការណ៍មួយដែលក្រសួងបានចេញផ្សាយ។

គួរបញ្ជាក់ថា ទីក្រុងប៉េកាំងបានចេញការព្រមានស្រដៀងគ្នានេះ ក្រោយការអត្ថាធិប្បាយរបស់លោកស្រី Takaichi ក្នុងខែវិច្ឆិកាឆ្នាំកន្លងមក ដែលលើកឡើងថា សន្មតថា មានការវាយប្រហាររបស់ចិនលើកោះតៃវ៉ាន់នោះ ទីក្រុងតូក្យូអាចឆ្លើយតបដោយយោធា។

ការអត្ថាធិប្បាយនេះបានធ្វើឲ្យទីក្រុងប៉េកាំងខឹងសម្បា ដែលបានឆ្លើយតបដោយការទប់ស្កាត់ការនាំចេញ ការលុបចោលជើងហោះហើរ និងការអត្ថាធិប្បាយពោរពេញដោយកំហឹងតាមបណ្ដាញសារព័ត៌មានរដ្ឋ។ ក្រសួងការពារជាតិរបស់ប្រទេសនេះ បានព្រមានទីក្រុងតូក្យូ អំពីការមាននូវភាពបរាជ័យផ្នែកយោធា «ដ៏ធ្ងន់ធ្ង» ប្រសិនបើខ្លួនប្រើកម្លាំង ដើម្បីធ្វើអន្តរាគមន៍ លើបញ្ហាកោះតៃវ៉ាន់។

ក្រុមហ៊ុនអាកាសចរណ៍ធំៗរបស់ចិន រួមមាន Air China, China Eastern និង China Southern Airlines កាលពីថ្ងៃចន្ទ បានពង្រីកគោលនយោបាយផ្លាស់ប្តូរ និងលុបចោលដោយឥតគិតថ្លៃ សម្រាប់ជើងហោះហើរដែលទាក់ទងនឹងប្រទេសជប៉ុន រហូតដល់ថ្ងៃទី២៤ ខែតុលា។ ក្រុមហ៊ុនអាកាសចរណ៍ទាំងនេះ បានប្រកាសពីគោលនយោបាយទាំងនេះ ជាលើកដំបូងនៅក្នុងខែវិច្ឆិកា បន្ទាប់ពីមានការលើកឡើងរបស់លោកស្រី Takaichi ហើយបន្ទាប់មកកាលពីខែមុនបានបន្តគោលនយោបាយទាំងនេះ រហូតដល់ខែមីនា៕