យោងតាមប្រព័ន្ធផ្សព្វផ្សាយរដ្ឋចិន នៅថ្ងៃចន្ទ (ទី២៦ ខែមករា ឆ្នាំ២០២៦) បានឲ្យដឹងថា លោកប្រធានាធិបតីចិន ស៊ី ជីនពីង (Xi Jinping) បានស្វែងរកការពង្រឹងទំនាក់ទំនងជាមួយវៀតណាម អំឡុងការសន្ទនាតាមទូរស័ព្ទជាមួយមេដឹកនាំដែលទើបជាប់ឆ្នោតឡើងវិញថ្មីៗនេះ ដោយបានបញ្ជាក់ថា ប្រទេសទាំង២ គួរតែបង្កើនកិច្ចសហប្រតិបត្តិការ ទាំងក្នុងកិច្ចការតំបន់ និងអន្តរជាតិ។

ការជជែកតាមទូរស័ព្ទនេះ គឺជាលើកទី១ រវាងមេដឹកនាំទាំង២ គិតចាប់តាំងពីលោក To Lam ត្រូវបានតែងតាំងឡើងវិញក្នុងសំឡេងឯកច្ឆន្ទជាប្រធានបក្សកុម្មុយនីស្តវៀតណាម សម្រាប់រយៈពេល ៥ឆ្នាំខាងមុខ កាលពីថ្ងៃសុក្រសប្តាហ៍មុន។

នៅក្នុងសារអបអរសាទរទៅកាន់លោក Lam លោក ស៊ី បានពិពណ៌នាអំពីប្រទេសទាំង២ ថា ជា «សហគមន៍ដែលមានអនាគតរួមគ្នា» ហើយបាននិយាយថា ទីក្រុងប៉េកាំងមានឆន្ទៈក្នុងការពង្រឹងទំនាក់ទំនងជាមួយទីក្រុងហាណូយ។ ទូរទស្សន៍រដ្ឋចិន CCTV បានដកស្រង់សម្តីរបស់លោក ស៊ី ដែលបាននិយាយថា៖ «ចិន និងវៀតណាម គួរតែរក្សាទិសដៅ និងនៅតែមិនងាករេពីសេចក្តីប្រាថ្នារបស់ប្រទេសទាំង២ ដោយធ្វើការរួមគ្នា ដើម្បីជំរុញការអភិវឌ្ឍ»។

រដ្ឋដែលគ្រប់គ្រងដោយលទ្ធិកុម្មុយនីស្តទាំង២ មានប្រវត្តិយូរអង្វែងនៃការមិនទុកចិត្ត និងជម្លោះទឹកដី រួមទាំងជុំវិញបញ្ហាដែនទឹក ក្នុងសមុទ្រចិនខាងត្បូង ទោះបីជាគណបក្សកុម្មុយនីស្តនៃភាគីទាំង២ នៅតែជិតស្និទ្ធជាផ្លូវការក៏ដោយ។

ជាមួយគ្នានេះ ប្រព័ន្ធផ្សព្វផ្សាយរដ្ឋ បានរាយការណ៍បន្ថែមថា លោក ស៊ី បានជំរុញលោក Lam ឲ្យ «រួមគ្នាប្រឆាំងនឹងអនុត្តរភាព និងការប្រឈមមុខដាក់គ្នារបស់ប្លុក« ទោះបីជាលោកមិនបាននិយាយឲ្យបានជាក់លាក់ពីប្រទេសណាមួយក៏ដោយ។

លើសពីនេះទៀត ក្នុងអំឡុងពេលជជែកតាមទូរសព្ទនាថ្ងៃចន្ទនេះ លោក ស៊ី បានសង្កត់ធ្ងន់ថា ភាគីទាំង២ ត្រូវតែ «ពង្រឹងការជឿជាក់គ្នា រក្សាគោលការណ៍ជាមូលដ្ឋាន ខណៈពេលដែលជំរុញនវានុវត្តន៍ ហើយការពារ និងកាត់បន្ថយហានិភ័យ និងបញ្ហាប្រឈមផ្សេងៗ៕