ក្បួនរថយន្តអង្គការសហប្រជាជាតិ(UN) ដឹកជំនួយសង្រ្គោះអាយុជីវិត បានធ្វើដំណើរទៅដល់ទីក្រុង Ain al-Arab ដែលភាគច្រើនគឺជាជនជាតិឃឺដ ស្ថិតនៅតំបន់ភាគខាងជើងប្រទេសស៊ីរី ស្របពេលដែលបទឈប់បាញ់រវាងកងទ័ពស៊ីរី និងកងកម្លាំងប្រជាធិបតេយ្យស៊ីរី(SDF)ដឹកនាំដោយក្រុមឃឺត បានបន្តចូលជាធរមាន ។

ក្បួនរថយន្តទៅដល់ទីក្រុង Ain al-Arab កាលពីថ្ងៃអាទិត្យ បានកើតមានឡើង ស្របពេលក្តីបារម្ភកើនឡើងចំពោះស្ថានភាពមនុស្សធម៌នៅក្នុងទីក្រុងមួយនេះ ដែលស្ថិតក្រោមការឡោមព័ទ្ធរបស់កងកម្លាំងរដ្ឋាភិបាលស៊ីរី ។

ការិយាល័យអង្គការសហប្រជាជាតិទទួលបន្ទុកការសម្របសម្រួលកិច្ចការមនុស្សធម៌(OCHA)និយាយថា ក្បួនរថយន្តនេះ មានរថយន្ត ២៤គ្រឿងដឹកជំនួយសង្រ្គោះជីវិត រួមទាំងប្រេងឥន្ធនៈ នំបុ័ង និងអាហារត្រៀមរួចជាស្រេចសម្រាប់បរិភោគ ដើម្បីគាំទ្រមនុស្សរងផលប៉ះពាល់ដោយសារជម្លោះកាលពីពេលថ្មីៗនេះ ។ ពួកគេបន្តថា ក្បួនរថយន្ត ត្រូវបានសម្របសម្រួលជាមួយរដ្ឋាភិបាលស៊ីរី ។

កងទ័ពស៊ីរី បាននិយាយនៅក្នុងសេចក្តីថ្លែងការណ៍ថា ពួកគេបានបើកច្រករបៀង ២កន្លែង មួយកន្លែងស្ថិតនៅទីក្រុង Ain al-Arab ខេត្ត Aleppo និងមួយកន្លែងទៀតស្ថិតនៅខេត្ត Hasakah ដើម្បីអនុញ្ញាតឲ្យជំនួយចូល ។

ទីក្រុង Ain al-Arab ដែលមានពលរដ្ឋរស់នៅ ៤០ម៉ឺននាក់ ស្ថិតនៅជាប់ព្រំដែនទួរគីនៅភាគខាងជើង ហើយកងកម្លាំងរដ្ឋាភិបាល បានឈរជើងនៅគ្រប់ជ្រុង ហើយវាមានចម្ងាយប្រហែល ២០០គ.មពីតំបន់កាន់កាប់របស់កងកម្លាំង SDF ស្ថិតនៅភាគឦសាន ប្រទេសស៊ីរី ។ កងកម្លាំង SDF បានចោទប្រកាន់កងទ័ពស៊ីរី ថាបានធ្វើការឡោមព័ទ្ធទីក្រុងមួយនេះ ៕