យោងតាមប្រព័ន្ធផ្សព្វផ្សាយក្នុងស្រុកចំនួនអ្នកស្លាប់ដោយសារបំណាក់ដីកាលពីថ្ងៃសៅរ៍ក្នុងប្រទេសឥណ្ឌូនេស៊ីបានកើនឡើងដល់ ៣៤ នាក់កាលពីថ្ងៃចន្ទ២៦មករាសប្ដាហ៍នេះ ខណៈប្រតិបត្តិការស្វែងរក និងជួយសង្គ្រោះនៅតែបន្តសម្រាប់មនុស្សរាប់សិបនាក់ដែលត្រូវបានរាយការណ៍ថាបាត់ខ្លួននៅខេត្ត ជ្វាខាងលិច (West Java)។

ទូរទស្សន៍ Kompas បានរាយការណ៍ថា បុគ្គលិកស្វែងរក និងជួយសង្គ្រោះបានរកឃើញសាកសពសរុបចំនួន ៣៤ នាក់ពីកន្លែងកើតហេតុ។

លោក Ade Dian Permana ប្រធានការិយាល័យស្វែងរក និងជួយសង្គ្រោះ Bandung បាននិយាយថា សាកសព៩នាក់បន្ថែមទៀតត្រូវបានទាញយកកាលពីថ្ងៃចន្ទ ដែលធ្វើឱ្យចំនួនជនរងគ្រោះសរុបកើនឡើងដល់ ៣៤ នាក់។

រហូតមកដល់ពេលនេះ មនុស្ស ១៧ នាក់ត្រូវបានកំណត់អត្តសញ្ញាណ និងប្រគល់ជូនក្រុមគ្រួសាររបស់ពួកគេវិញ ខណៈក្រុមការងារកោសល្យវិច្ច័យកំពុងបន្តកិច្ចខិតខំប្រឹងប្រែងកំណត់អត្តសញ្ញាណសាកសពនៅសល់ ដោយមនុស្សប្រហែល ៥៦ នាក់ត្រូវបានគេជឿថានៅតែបាត់ខ្លួន។

ក្នុងសេចក្តីថ្លែងការណ៍ដាច់ដោយឡែកមួយ លោក Muhammad Ali នាយសេនាធិការកងទ័ពជើងទឹកឥណ្ឌូនេស៊ីបាននិយាយថា ទាហានចំនួន ២៣ នាក់ត្រូវបានកប់ដោយបំណាក់ដីក្នុងអំឡុងពេលសមយុទ្ធហ្វឹកហាត់ក្នុងតំបន់នោះ។ ទាហាន៤នាក់ត្រូវបានបញ្ជាក់ថាស្លាប់ ខណៈ១៩ នាក់នៅតែបាត់ខ្លួន នេះបើយោងតាមការចុះផ្សាយរបស់សារព័ត៌មាន Jakarta Globe។

បំណាក់ដីនេះបានវាយប្រហារភូមិមួយក្នុងតំបន់ West Bandung កាលពីថ្ងៃសៅរ៍ ដោយមានផ្ទះរាប់សិបខ្នងត្រូវបានកប់នៅក្រោមល្បប់ និងកម្ទេចកម្ទី។

ក្រុមស្វែងរក និងជួយសង្គ្រោះកំពុងបន្តកិច្ចខិតខំប្រឹងប្រែងក្នុងតំបន់រងផលប៉ះពាល់ ខណៈការព្យាករណ៍អាកាសធាតុព្រមានពីភ្លៀងធ្លាក់ពីកម្រិតមធ្យមទៅខ្លាំងក្នុងរយៈពេលប៉ុន្មានថ្ងៃខាងមុខ ដែលធ្វើឱ្យប្រតិបត្តិការមានភាពស្មុគស្មាញ៕