កងឆ្មាំល្បាតឆ្នេរហ្វីលីពីន បាននិយាយថា ប្រតិបត្តិការស្វែងរក និងជួយសង្គ្រោះ បានបន្តជាថ្មីម្ដងទៀតនៅថ្ងៃអង្គារ (២៧ មករា) នេះ ដើម្បីតាមរកមនុស្ស ១០នាក់ ដែលនៅតែបាត់ខ្លួន បន្ទាប់ពីសាឡាងដឹកអ្នកដំណើរមួយគ្រឿង បានលិចនៅខេត្តភាគខាងត្បូងប្រទេសហ្វីលីពីន ហើយចំនួនអ្នកស្លាប់ពីហេតុការណ៍ដ៏រន្ធត់នេះ បានកើនឡើងដល់ ១៨នាក់។

អ្នកនាំពាក្យឆ្មាំល្បាតឆ្នេរហ្វីលីពីន បាននិយាយថា ចំនួនមនុស្សសរុបដែលជិះនៅលើសាឡាងពេលជួបគ្រោះថ្នាក់ ត្រូវបានកែសម្រួលមកត្រឹម ៣៤៤នាក់ ពោលគឺ ធ្លាក់ចុះពីតួលេខ ៣៥៩នាក់ពីមុន បន្ទាប់ពីបានផ្ទៀងផ្ទាត់ថា មនុស្ស ១៥នាក់ដែលមានឈ្មោះក្នុងបញ្ជី មិនបានឡើងជិះសាឡាងនោះទេ ចំណែកអ្នកដំណើរដែលត្រូវបានជួយសង្គ្រោះ គឺនៅតែមានចំនួន ៣១៦នាក់។

គ្រោះថ្នាក់នេះបានកើតឡើងនៅវេលាម៉ោងក្នុងស្រុក ១:៥០ នាទីទាបភ្លឺកាលពីថ្ងៃចន្ទ នៅពេលដែលសាឡាងដឹកអ្នកដំណើរ ឈ្មោះ MV Trisha Kerstin 3 កំពុងធ្វើដំណើរឆ្ពោះទៅកាន់កោះ Jolo ក្នុងខេត្ត Sulu បន្ទាប់ពីចេញដំណើរពីទីក្រុង Zamboanga។ ឆ្មាំល្បាតឆ្នេរហ្វីលីពីន បាននិយាយថា សាឡាងនេះត្រូវបានអនុញ្ញាតឱ្យផ្ទុកអ្នកដំណើរចំនួន ៣៥២នាក់។

ឆ្មាំល្បាតឆ្នេរហ្វីលីពីន បាននិយាយថា ខ្លួនមិនទាន់អាចសន្និដ្ឋានពីមូលហេតុដែលសាឡាងលិចនៅឡើយទេ ដោយការស៊ើបអង្កេតនៅតែកំពុងដំណើរការ។ គ្រោះថ្នាក់សមុទ្រគឺជារឿងធម្មតាទៅហើយនៅក្នុងប្រទេសហ្វីលីពីន ដែលជាប្រជុំកោះមួយមានជាង ៧.០០០កោះ និងមានកំណត់ត្រាសុវត្ថិភាពដែនសមុទ្រមិនច្បាស់លាស់៕