សហរដ្ឋអាមេរិកទទូចថា លោក Donald Trump នឹងមិនបោះបង់ចោលសន្តិភាពឡើយ ហើយបន្តចូលរួមយ៉ាងសកម្មក្នុងដំណើរការនេះ មុនកិច្ចចរចាត្រីភាគីនៅថ្ងៃអាទិត្យសប្ដាហ៍នេះ។

អ្នកនាំពាក្យសេតវិមាន លោកស្រី Karoline Leavitt បានបញ្ជាក់ជាថ្មីនូវការប្តេជ្ញាចិត្តរបស់ប្រធានាធិបតីចំពោះសន្តិភាព បន្ទាប់ពីមន្ត្រីរុស្ស៊ី និងអ៊ុយក្រែន បានជួបគ្នារយៈពេលពីរថ្ងៃនៅទីក្រុង អាប៊ូដាប៊ី (Abu Dhabi ) ប្រទេស អេមីរ៉ាត់ អារ៉ាប់រួម ដែលត្រូវបានទីក្រុងគីវហៅថាជាជំនួបប្រកបដោយផ្លែផ្កា។

លោកប្រធានាធិបតី Volodymyr Zelenskyy បាននិយាយថា កិច្ចព្រមព្រៀងសន្តិសុខរបស់សហរដ្ឋអាមេរិកសម្រាប់អ៊ុយក្រែនរួចរាល់១០០% សម្រាប់ការចុះហត្ថលេខា។

មេដឹកនាំអ៊ុយក្រែនបានអំពាវនាវឱ្យបន្តការចរចាលឿនជាងថ្ងៃអាទិត្យខាងមុខ ដោយបន្ថែមថា ជំហានដែលបានធ្វើឡើងនៅទីក្រុង អាប៊ូដាប៊ី គួរតែត្រូវបានត្រួតពិនិត្យ។

ការជំរុញ និងអំពាវនាវនេះ កើតឡើង ខណៈទីក្រុងមូស្គូត្រូវបានរងផលប៉ះពាល់ផ្នែកហិរញ្ញវត្ថុ បន្ទាប់ពីបណ្តាប្រទេសសហភាពអឺរ៉ុបបានផ្តល់ការអនុម័តយល់ព្រមចុងក្រោយសម្រាប់ការហាមប្រាមការនាំចូលឧស្ម័នរបស់រុស្ស៊ីនៅចុងឆ្នាំ ២០២៧ មានន័យថា សំណើនេះឥឡូវនេះអាចក្លាយជាច្បាប់របស់ប្លុកនេះ។

លោក Trump បាននិយាយថា សាររបស់លោកចំពោះមេដឹកនាំរុស្ស៊ី Vladimir Putin គឺថា សង្គ្រាមនៅអ៊ុយក្រែនត្រូវតែចប់ បន្ទាប់ពីអ្វីដែលលោកបានហៅថា ជាការពិភាក្សាដ៏ល្អជាមួយមេដឹកនាំអ៊ុយក្រែន នៅទីក្រុងដាវ៉ូស ប្រទេសស្វីស កាលពីសប្ដាហ៍មុន ខណៈទីក្រុងវ៉ាស៊ីនតោនបង្កើនកិច្ចខិតខំប្រឹងប្រែងការទូតជំរុញដំណោះស្រាយបញ្ចប់ជម្លោះជិត៤ឆ្នាំ៕