តម្លៃប្រេងបានធ្លាក់ចុះបន្តិចកាលីថ្ងៃចន្ទ២៦មករាដើមសប្ដាហ៍នេះ បន្ទាប់ពីកើនឡើងជាង ២%ក្នុងវគ្គមុន ខណៈក្រុមវិនិយោគិនបានវាយតម្លៃពីផលប៉ះពាល់លើទិន្នផលក្នុងតំបន់ផលិតប្រេងឆៅរបស់សហរដ្ឋអាមេរិក ពីព្យុះរដូវរងា និងផលប៉ះពាល់នៃភាពតានតឹងណាមួយរវាងអាមេរិក និងអ៊ីរ៉ង់។

ភាគហ៊ុនប្រេងឆៅ Brent របស់អាមេរិក បានធ្លាក់ចុះ ២៩ សេន ឬ ០,៤% នៅត្រឹម៦៥,៥៩ដុល្លារ ក្នុងមួយបារ៉ែល ខណៈប្រេងឆៅ West Texas Intermediate មួយទៀតរបស់សហរដ្ឋអាមេរិក បានធ្លាក់ចុះ ៤៤ សេន ឬ ០,៧% មកនៅត្រឹម៦០,៦៣ ដុល្លារអាមេរិក ក្នុងមួយបារ៉ែល។

តម្លៃភាគហ៊ុនប្រេងទាំងពីរបានកើនឡើងប្រចាំសប្តាហ៍ ២,៧ % រហូតដល់ពេលបិទនៅថ្ងៃសុក្រសប្ដា៍មុន ដែលជាកម្រិតខ្ពស់បំផុតរបស់ខ្លួនចាប់តាំងពីថ្ងៃទី១៤ មករា។

ក្រុមអ្នកវិភាគ និងក្រុមហ៊ុនជួញដូរបានប៉ាន់ប្រមាណថា ក្រុមហ៊ុនផលិតប្រេងរបស់សហរដ្ឋអាមេរិកបានបាត់បង់រហូតដល់២ លានបារ៉ែលក្នុងមួយថ្ងៃ ឬប្រហែល១៥% នៃផលិតកម្មជាតិកាលពីចុងសប្តាហ៍មុន ខណៈព្យុះរដូវរងាបានបោកបក់ពាសពេញសហរដ្ឋអាមេរិក ដែលធ្វើឱ្យហេដ្ឋារចនាសម្ព័ន្ធថាមពល និងបណ្តាញអគ្គិសនីជួបការរំខានខ្លាំង។ការដាច់ចរន្តផលិតកម្មប្រេងបានឡើងដល់កម្រិតកំពូលកាលពីថ្ងៃសៅរ៍ ។

ក្រុមអ្នកវិភាគនិយាយថា ក្រុមហ៊ុនជួញដួរនានាមានក្ដីបារម្ភខ្លាំងពីហានីភ័យនៃភូមិសាស្ត្រនយោបាយ ខណៈភាពតានតឹងរវាងអាមេរិក និងអ៊ីរ៉ង់នៅតែបន្តធ្វើឲ្យក្រុមវិនិយោគិនព្រួយបារម្ភ។

កាលពីចុងសប្ដាហ៍នេះ មន្ត្រីជាន់ខ្ពស់អ៊ីរ៉ង់មួយរូបបាននិយាយថាអ៊ីរ៉ង់ នឹងវាយបកវិញរាល់ការវាយប្រហារណាមួយរបស់អាមេរិកមកលើប្រទេសរបស់ខ្លួនជុំវិញការតវ៉ាប្រឆាំងរដ្ឋាភិបាលបណ្ដាលឲ្យមនុស្សរាប់ពាន់នាក់ស្លាប់ចាប់តាំងពីចុងខែធ្នូ២០២៥ នៅអ៊ីរ៉ង់ ៕