ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ ទី២៦ ខែមករា ថា លោកកំពុងដំឡើងពន្ធលើការនាំចូលរបស់ប្រទេសកូរ៉េខាងត្បូងចូលទៅក្នុងសហរដ្ឋអាមេរិកពាក់ព័ន្ធនឹងរថយន្ត ឈើ និងឱសថរហូតដល់២៥ភាគរយ ខណៈចោទប្រកាន់សភាសម្ព័ន្ធមិត្តមួយនេះថា «មិនបានគោរពតាម» កិច្ចព្រមព្រៀងពាណិជ្ជកម្មរបស់ខ្លួនជាមួយទីក្រុងវ៉ាស៊ីនតោន។

លោក Trump បានសរសេរនៅលើបណ្តាញផ្សព្វផ្សាយសង្គមថា «សភារបស់ប្រទេសកូរ៉េខាងត្បូងមិនបានគោរពតាមកិច្ចព្រមព្រៀងរបស់ខ្លួនជាមួយសហរដ្ឋអាមេរិកទេ»។ «ដោយសារតែសភាកូរ៉េ មិនទាន់បានអនុម័តកិច្ចព្រមព្រៀងពាណិជ្ជកម្មជាប្រវត្តិសាស្ត្ររបស់យើង ជាសិទ្ធិរបស់ពួកគេ ខ្ញុំដាក់ចេញការដំឡើងពន្ធលើកូរ៉េខាងត្បូងលើរថយន្ត ឈើ ឱសថ និងពន្ធបដិការផ្សេងទៀតពី១៥ភាគរយដល់២៥ ភាគរយ»។ វាមិនទាន់ច្បាស់ភ្លាមៗនោះទេថា ការដំឡើងពន្ធនឹងចូលជាធរមាននៅពេលណា។

វិមានប្រធានាធិបតីកូរ៉េខាងត្បូងបាននិយាយនៅថ្ងៃអង្គារនេះថា រដ្ឋមន្ត្រីឧស្សាហកម្ម លោក Kim Jung-kwan នឹងធ្វើទស្សនកិច្ចនៅសហរដ្ឋអាមេរិកក្នុងពេលឆាប់ៗនេះ និងជួបជាមួយរដ្ឋមន្ត្រីពាណិជ្ជកម្មសហរដ្ឋអាមេរិក លោក Howard Lutnick។

សេតវិមានបាននិយាយថា រដ្ឋាភិបាលសហរដ្ឋអាមេរិកមិនទាន់បានផ្តល់ការជូនដំណឹងជាផ្លូវការលើបញ្ហានេះទេ ហើយទីប្រឹក្សាប្រធានាធិបតីកូរ៉េខាងត្បូងនឹងបើកកិច្ចប្រជុំជាមួយក្រសួងពាក់ព័ន្ធដើម្បីពិភាក្សាអំពីវិធានការនានា។ លោក Trump កាលពីពេលមុន បានគំរាមដំឡើងពន្ធផ្សេងទៀត ហើយក្នុងករណីខ្លះបានពន្យារពេល ឬមិនបានអនុវត្តតាម។ ប្រទេសកូរ៉េខាងត្បូង បានខិតខំអនុវត្តកិច្ចព្រមព្រៀងដែលបានប្រកាសជាមួយទីក្រុងវ៉ាស៊ីនតោនកាលពីឆ្នាំមុន ដែលបានបន្ថយការដំឡើងពន្ធរបស់សហរដ្ឋអាមេរិកលើការនាំចេញជាច្រើនរបស់ខ្លួនមកនៅត្រឹម ១៥ ភាគរយ។ ប៉ុន្តែកាលពីដើមខែនេះ រដ្ឋមន្ត្រីក្រសួងហិរញ្ញវត្ថុកូរ៉េខាងត្បូងបាននិយាយថា ការវិនិយោគតាមផែនការចំនួន៣៥០ពាន់លានដុល្លារអាមេរិករបស់ប្រទេសនេះនៅក្នុងវិស័យជាយុទ្ធសាស្ត្ររបស់សហរដ្ឋអាមេរិកក្រោមកិច្ចព្រមព្រៀងពាណិជ្ជកម្មនេះមិនទំនងជាចាប់ផ្តើមនៅឆមាសទីមួយនៃឆ្នាំ២០២៦ទេ ដោយលើកឡើងពីរូបិយប័ណ្ណប្រាក់វ៉ុនចុះខ្សោយ។