យោធាប្រទេសនីហ្សេរីយ៉ា បាននិយាយកាលពីថ្ងៃចន្ទ ទី ២៦ ខែមករា ថា យោធានឹងកាត់ទោសមន្ត្រីជាច្រើនរូបក្នុងការចោទប្រកាន់ពីបទរៀបចំផែនការផ្តួលរំលំប្រធានាធិបតី លោក Bola Tinubu កាលពីឆ្នាំមុន។ កាលពីខែតុលា យោធាបាននិយាយថា មន្ត្រី ១៦ នាក់ត្រូវបានចាប់ខ្លួនពីបទ «បញ្ហានៃការមិនគោរពវិន័យ»។

ទោះបីជាមានការបដិសេធជាផ្លូវការក៏ដោយ ប្រភពព័ត៌មានទូទាំងរដ្ឋាភិបាលនីហ្សេរីយ៉ា និងយោធា បានប្រាប់សារព័ត៌មាន AFP ថា ពួកគេត្រូវបានចាប់ខ្លួនពីបទរៀបចំផែនការធ្វើរដ្ឋប្រហារ។ ប្រសិនបើទទួលបានជោគជ័យ នេះនឹងបញ្ចប់រយៈពេល២៥ឆ្នាំនៃលទ្ធិប្រជាធិបតេយ្យនៅក្នុងប្រទេសដែលមានប្រជាជនច្រើនបំផុតនៅអាហ្វ្រិក។

ឧត្តមសេនីយ៍ Samaila Uba អ្នកនាំពាក្យនៃទីបញ្ជាការកណ្តាលក្រសួងការពារជាតិបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា «កងកម្លាំងប្រដាប់អាវុធនីហ្សេរីយ៉ា (AFN) បានជូនដំណឹងដល់សាធារណជនថា ការស៊ើបអង្កេតលើបញ្ហានេះត្រូវបានបញ្ចប់ហើយ»។

លោកបាននិយាយថា «ការរកឃើញនេះ បានកំណត់អត្តសញ្ញាណមន្ត្រីមួយចំនួនដែលមានការចោទប្រកាន់ពីបទរៀបចំផែនការផ្តួលរំលំរដ្ឋាភិបាល»។ «អ្នកទាំងឡាយមានសំណុំរឿងត្រូវផ្តល់ចម្លើយ នឹងត្រូវនាំខ្លួនជាផ្លូវការទៅកាន់តុលាការយោធាដើម្បីប្រឈមនឹងការជម្រះក្តី»។

យោងតាមអ្នកជំនាញផ្នែកច្បាប់បានឲ្យដឹងថា មន្ត្រីទាំងនោះអាចប្រឈមនឹងទោសប្រហារជីវិត ប្រសិនបើត្រូវបានរកឃើញថាមានទោស។ មិនយូរប៉ុន្មានបន្ទាប់ពីបដិសេធផែនការធ្វើរដ្ឋប្រហារ ដែលត្រូវបានចោទប្រកាន់ លោក Tinubu បានរុះរើតំណែងមន្ត្រីយោធាជាន់ខ្ពស់របស់ប្រទេស។