នាយករដ្ឋមន្ត្រីកាណាដា លោក Mark Carney កាលពីថ្ងៃចន្ទ ទី២៦ ខែមករា បាននិយាយសម្រាលពីការគំរាមដំឡើងពន្ធថ្មីបំផុតរបស់ប្រធានាធិបតីសហរដ្ឋអាមេរិក លោក Donald Trump លើប្រទេសកាណាដា ដោយនិយាយថា ការលើកឡើងទាំងនេះគួរតែត្រូវបានពិនិត្យដោយផ្តោតលើការពិនិត្យឡើងវិញកិច្ចព្រមព្រៀងពាណិជ្ជកម្មនាពេលខាងមុខ។

នៅពេលត្រូវបានសួរអំពីការគំរាមរបស់លោក Trump ក្នុងការដំឡើងពន្ធ១០០ភាគរយលើការនាំចូលរបស់ប្រទេសកាណាដា ប្រសិនបើទីក្រុង Ottawa បញ្ចប់កិច្ចព្រមព្រៀងពាណិជ្ជកម្មថ្មីជាមួយប្រទេសចិន លោកCarney បានប្រាប់អ្នកសារព័ត៌មានថា កិច្ចព្រមព្រៀងពាណិជ្ជកម្មសេរីអាមេរិកខាងជើងនឹងត្រូវពិនិត្យឡើងវិញនៅឆ្នាំនេះ។

លោក Carney និយាយថា «ខ្ញុំគិតថាការលើកឡើងទាំងនេះនិងជំហរមួយចំនួន គួរតែត្រូវបានពិនិត្យនៅក្នុងបរិបទដ៏ទូលំទូលាយនៃរឿងនេះ»។

លោកTrump រហូតមកដល់ពេលនេះបានប្រកាន់ខ្ជាប់នូវកិច្ចព្រមព្រៀងសហរដ្ឋអាមេរិក-កាណាដា-ម៉ិកស៊ិក(USMCA)មានស្រាប់ភាគច្រើន ដែលលោកប្រធានាធិបតីបានចរចា និងសរសើរក្នុងអំឡុងពេលអាណត្តិដំបូងរបស់លោក។

ប្រទេសកាណាដា ត្រូវបានរងផលប៉ះពាល់យ៉ាងខ្លាំងដោយការដំឡើងពន្ធរបស់លោក Trump ជាពិសេសនៅក្នុងវិស័យរថយន្ត ដែកថែប និងអាលុយមីញ៉ូម ប៉ុន្តែជាង៨៥ភាគរយនៃពាណិជ្ជកម្មទ្វេភាគីរវាងសហរដ្ឋអាមេរិក និងកាណាដា នៅតែមិនដំឡើងពន្ធតាមរយៈសង្គ្រាមពាណិជ្ជកម្មដែលកំពុងបន្តនេះទេ។