បណ្តាប្រទេសសហភាពអឺរ៉ុប កាលពីថ្ងៃចន្ទ (២៦ មករា) បានផ្តល់ការអនុម័តចុងក្រោយរបស់ពួកគេ ដើម្បីហាមឃាត់ការនាំចូលឧស្ម័នពីរុស្ស៊ី ជាដំណាក់កាល នៅត្រឹមចុងឆ្នាំ២០២៧ ដោយប្ដេជ្ញាថា នឹងកាត់ផ្តាច់ទំនាក់ទំនងជាមួយអតីតអ្នកផ្គត់ផ្គង់ឧស្ម័នចម្បងរបស់ពួកគេ រយៈពេលជិត ៤ឆ្នាំបន្ទាប់ពីប្រតិបត្តិការយោធាទ្រង់ទ្រាយធំរបស់ទីក្រុងមូស្គូ លើអ៊ុយក្រែន។

រដ្ឋមន្ត្រីមកពីបណ្តាសមាជិកប្លុកអឺរ៉ុប បានអនុម័តច្បាប់នេះក្នុងកិច្ចប្រជុំមួយនៅទីក្រុងព្រុចសែល កាលពីថ្ងៃចន្ទ ទោះបីជាស្លូវ៉ាគី និងហុងគ្រី បានបោះឆ្នោតប្រឆាំងក៏ដោយ ហើយប៊ុលហ្គារី បានអនុប្បវាទ។ ហុងគ្រី និយាយថា ខ្លួននឹងជំទាស់នឹងច្បាប់នេះនៅឯតុលាការយុត្តិធម៌អឺរ៉ុប ECJ។

សេចក្ដីស្នើច្បាប់ហាមឃាត់នេះ ត្រូវបានរៀបចំឡើងដើម្បីទទួលបានសំឡេងអនុម័តពីប្រទេសប្លុកអឺរ៉ុបភាគច្រើន ដែលអនុញ្ញាតឱ្យយកឈ្នះលើការប្រឆាំងពីហុងគ្រី និងស្លូវ៉ាគី ដែលនៅតែពឹងផ្អែកយ៉ាងខ្លាំងលើការនាំចូលថាមពលរបស់រុស្ស៊ី និងចង់រក្សាទំនាក់ទំនងជិតស្និទ្ធជាមួយទីក្រុងមូស្គូ។ ក្រោមកិច្ចព្រមព្រៀងនេះ សហភាពអឺរ៉ុបនឹងបញ្ឈប់ការនាំចូលឧស្ម័នធម្មជាតិរាវរបស់រុស្ស៊ី នៅចុងឆ្នាំ២០២៦ និងបញ្ឈប់ការនាំចូលឧស្ម័នតាមបំពង់បង្ហូរប្រេង នៅថ្ងៃទី៣០ ខែកញ្ញា ឆ្នាំ២០២៧។

យ៉ាងណាមិញ ច្បាប់នេះអនុញ្ញាតឱ្យថ្ងៃផុតកំណត់ អាចប្តូរទៅថ្ងៃទី១ ខែវិច្ឆិកា ឆ្នាំ២០២៧ យ៉ាងយូរបំផុត ប្រសិនបើប្រទេសណាមួយនៅតែលំបាកក្នុងការបំពេញតម្រូវការឧស្ម័នដែលមិនមែនជារបស់រុស្ស៊ី មុនរដូវរងា។ នេះគឺជាកិច្ចប្រឹងប្រែងរបស់អឺរ៉ុប ដើម្បីគាំទ្រអ៊ុយក្រែន និងរឹតត្បិតមូលនិធិដល់សេដ្ឋកិច្ចសម័យសង្គ្រាមរបស់រុស្ស៊ី។ យោងតាមទិន្នន័យចុងក្រោយបំផុតរបស់ប្លុកអឺរ៉ុប រុស្ស៊ីផ្គត់ផ្គង់ឧស្ម័នជាង ៤០% របស់ប្លុកនេះ មុនឆ្នាំ២០២២ ប៉ុន្តែអត្រាបានធ្លាក់ចុះមកត្រឹមប្រហែល ១៣% ក្នុងឆ្នាំ២០២៥៕