ទីភ្នាក់ងារអន្តោប្រវេសន៍របស់អង្គការសហប្រជាជាតិ កាលពីថ្ងៃចន្ទ (២៦ មករា) បានសម្ដែងក្ដីបារម្ភរបស់ខ្លួនថា មនុស្សរាប់រយនាក់ អាចនឹងស្លាប់ ឬបាត់ខ្លួន បន្ទាប់ពីព្យាយាមឆ្លងកាត់សមុទ្រមេឌីទែរ៉ាណេដ៏គ្រោះថ្នាក់ ក្រោយមានរបាយការណ៍អំពីការលិចទូកជាច្រើនគ្រឿងក្នុងរយៈពេល ១០ថ្ងៃចុងក្រោយនេះ ដោយសារកាសធាតុអាក្រក់។

អង្គការទេសន្តរប្រវេសន៍អន្តរជាតិ IOM បានបញ្ជាក់ថា «ចំនួនអ្នកស្លាប់ចុងក្រោយអាចខ្ពស់ខ្លាំងគួរឱ្យកត់សម្គាល់ ដែលជាការក្រើនរំលឹកយ៉ាងច្បាស់ថា ផ្លូវទឹកនេះនៅតែជាច្រករបៀងអន្តោប្រវេសន៍ដ៏គ្រោះថ្នាក់បំផុតនៅលើពិភពលោក»។

នៅក្នុងសេចក្តីថ្លែងការណ៍មួយ អង្គការ IOM បាននិយាយថា មនុស្ស ៣នាក់ — រួមមានក្មេងស្រីភ្លោះ ២នាក់អាយុប្រហែល ១ខួប និងបុរសម្នាក់ — ត្រូវបញ្ជាក់ថាបានស្លាប់នៅកោះ Lampedusa ប្រទេសអ៊ីតាលី បន្ទាប់ពីប្រតិបត្តិការស្វែងរក និងជួយសង្គ្រោះទូកមួយគ្រឿងដែលបានលិច ក្រោយចាកចេញពីប្រទេសទុយនេស៊ី។ IOM បន្តថា អ្នករួចជីវិតតែម្នាក់ប៉ុណ្ណោះពីហេតុការណ៍នេះ បាននិយាយថា ទូកផ្សេងទៀតបានចេញដំណើរក្នុងពេលដំណាលគ្នា ប៉ុន្តែមិនបានទៅដល់គោលដៅទេ ហើយជោគវាសនារបស់ទូកទាំងនោះ នៅមិនទាន់ដឹងនៅឡើយ។

យោងតាមអង្គការ IOM ក្នុងពេល ១០ ថ្ងៃកន្លងមកនេះ ស្របពេលព្យុះនៅសមុទ្រមេឌីទែរ៉ាណេដ៏ខ្លាំងក្លា ទូកជាច្រើនគ្រឿងត្រូវគេជឿថា បានបាត់ខ្លួន ដែលធ្វើឱ្យមនុស្សរាប់រយនាក់នៅលើនោះ ក៏បាត់ខ្លួនផងដែរ ហើយកិច្ចប្រឹងប្រែងស្វែងរកត្រូវបានរារាំងដោយអាកាសធាតុមិនល្អ។ យោងតាមតួលេខរបស់ទីភ្នាក់ងារនេះបានបង្ហាញថា ក្នុងឆ្នាំ២០២៥ មនុស្សយ៉ាងហោចណាស់ ១.៣៤០នាក់ បានស្លាប់នៅសមុទ្រមេឌីទែរ៉ាណេភាគកណ្តាល៕