អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) កាលពីថ្ងៃចន្ទ បានអំពាវនាវឲ្យរដ្ឋជាសមាជិកប្តេជ្ញាចិត្តឡើងវិញចំពោះការគោរពច្បាប់អន្តរជាតិយ៉ាងពេញលេញ។

លោកបានប្រាប់ការជជែកពិភាក្សាបើកចំហរបស់ក្រុមប្រឹក្សាសន្តិសុខស្តីពីនីតិរដ្ឋអន្តរជាតិថា៖ «នីតិរដ្ឋគឺជាមូលដ្ឋានគ្រឹះនៃសន្តិភាព និងសន្តិសុខសកល។ គន្លឹះនៃទំនាក់ទំនងមិត្តភាពក្នុងចំណោមប្រទេស និងតំបន់នានានៃពិភពលោក និងជាគោលការណ៍ស្នូលដ៏រស់រវើកនៃធម្មនុញ្ញអង្គការសហប្រជាជាតិ»។ «អស់រយៈពេល ៨០ ឆ្នាំមកហើយ វាបានជួយមនុស្សជាតិឲ្យជៀសវាងសង្គ្រាមលោកលើកទី ៣ និងបានបន្ធូរបន្ថយការស្លាប់របស់មនុស្ស នៅក្នុងជម្លោះតូចៗរាប់មិនអស់»។

លោក ហ្គុយតឺរេស បាននិយាយថា ធម្មនុញ្ញអង្គការសហប្រជាជាតិ និងឧបករណ៍ច្បាប់អន្តរជាតិផ្សេងទៀតបានរួមចំណែកដល់ប្រព័ន្ធសន្តិសុខរួមមួយដែលរឹងមាំ និងធន់។ ប្រព័ន្ធនេះ ហាមឃាត់ការគំរាមកំហែង ឬការប្រើប្រាស់កម្លាំង ហើយចងរដ្ឋទាំងអស់ ទាំងធំទាំងតូច ទៅនឹងច្បាប់ដូចគ្នា និងគោរពគោលការណ៍នៃអធិបតេយ្យភាព ឯករាជ្យភាពនយោបាយ និងបូរណភាពទឹកដីរបស់រដ្ឋទាំងអស់។ 

លោក ហ្គុយតឺរេស បានលើកឡើងថា៖«សម្រាប់ប្រទេសតូចៗ និងប្រទេសដែលមានអំណាចតិចជាង និងអ្នកដែលរងទុក្ខដោយអយុត្តិធម៌ក្នុងប្រវត្តិសាស្ត្រ និងមរតកដ៏បំផ្លិចបំផ្លាញនៃការគ្រប់គ្រងអាណានិគម ច្បាប់អន្តរជាតិ គឺជាខ្សែជីវិតដែលតម្រូវឲ្យមានការយកចិត្តទុកដាក់ស្មើភាពគ្នា អធិបតេយ្យភាព សេចក្តីថ្លៃថ្នូរ និងយុត្តិធម៌ ហើយសម្រាប់ប្រទេសដែលមានអំណាច វាគឺជារបាំងការពារដែលកំណត់អ្វីដែលអាចទទួលយកបាន និងអ្វីដែលមិនអាចទទួលយកបាន នៅក្នុងគ្រាមានភាពមិនចុះសម្រុងគ្នា ការបែកបាក់ និងជម្លោះដោយផ្ទាល់»។

លោក ហ្គុយតឺរេស បាននិយាយថា ស្ថាបនិកនៃអង្គការសហប្រជាជាតិយល់ថា បញ្ហាសកលលោកអាចដោះស្រាយបាន លុះត្រាតែមិនប្រើប្រាស់អាវុធសង្គ្រាមទេ ប្រើប្រាស់ឧបករណ៍ការទូត ដែលគាំទ្រដោយប្រព័ន្ធដែលផ្អែកលើច្បាប់អន្តរជាតិ តាមរយៈការសន្ទនា មិនមែនប្រើវោហាសាស្ត្រនៃការបំបែកបំបាក់ និងតាមរយៈកិច្ចសហការ មិនមែនការប្រកួតប្រជែងខាងភូមិសាស្ត្រនយោបាយទេ៕