យោងតាមសមាជិកសភាជាន់ខ្ពស់ម្នាក់បានឲ្យដឹងថា កាលពីថ្ងៃចន្ទសភាអឺរ៉ុប បានពន្យារពេលរហូតដល់សប្តាហ៍ក្រោយលើការសម្រេចចិត្តថាតើត្រូវចាប់ផ្តើមការងារឡើងវិញលើកិច្ចព្រមព្រៀងពាណិជ្ជកម្មរវាងសហភាពអឺរ៉ុបនិងសហរដ្ឋអាមេរិកឬយ៉ាងណាបន្ទាប់ពីផ្អាកដំណើរការអនុម័តរបស់ខ្លួនកាលពីសប្តាហ៍មុនក្នុងការតវ៉ាប្រឆាំងនឹងការជំរុញរបស់ប្រធានាធិបតីសហរដ្ឋអាមេរិក លោក Donald Trump ក្នុងការទិញដែនដីកោះហ្គ្រីនលែនមកគ្រប់គ្រង និងការគំរាមដំឡើងពន្ធរបស់លោកលើសម្ព័ន្ធមិត្តអឺរ៉ុប។

ដោយបញ្ជាក់ថា ពុំមានការសម្រេចចិត្តណាមួយត្រូវបានធ្វើឡើងកាលពីថ្ងៃចន្ទដើម្បីបន្តនីតិវិធីច្បាប់ដ៏សាម័ញ្ញរវាងសហភាពអឺរ៉ុបនិងសហរដ្ឋអាមេរិក លោក Bernd Lange ប្រធានគណៈកម្មាធិការពាណិជ្ជកម្មអន្តរជាតិរបស់សភាអឺរ៉ុប បាននិយាយនៅក្នុងសារមួយនៅលើបណ្តាញ X ថា ក្រុមចរចារបស់សភានឹងជួបប្រជុំគ្នានៅថ្ងៃទី៤ ខែកុម្ភៈ ដើម្បីវាយតម្លៃឡើងវិញពីស្ថានភាព។ កាលពីថ្ងៃទី២១ ខែមករា សភាអឺរ៉ុបបានសម្រេចផ្អាកការអនុម័តកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងសហរដ្ឋអាមេរិក បន្ទាប់ពីការគំរាមដំឡើងពន្ធរបស់សហរដ្ឋអាមេរិកទាក់ទងនឹងដែនដីហ្គ្រីនលែន។

ភាពតានតឹង បានធូរស្រាលក្រោយមក នៅពេលដែលទីក្រុងវ៉ាស៊ីនតោនបានប្រកាសថា «កិច្ចព្រមព្រៀងក្របខ័ណ្ឌ» ត្រូវបានឈានដល់លើបញ្ហាទាក់ទងនឹងដែនដីហ្គ្រីនលែន ហើយការគំរាមដំឡើងពន្ធលើប្រទេសអឺរ៉ុបចំនួនប្រាំបី នឹងត្រូវបានផ្អាក។ ក្រោមកិច្ចព្រមព្រៀងពាណិជ្ជកម្មរវាងសហភាពអឺរ៉ុប-សហរដ្ឋអាមេរិក ដែលបានឈានដល់កាលពីខែកក្កដា ឆ្នាំមុន សហភាពអឺរ៉ុបនឹងលុបចោលការដំឡើងពន្ធលើផលិតផលឧស្សាហកម្មទាំងអស់របស់សហរដ្ឋអាមេរិក និងដាក់ចេញកូតាអត្រាដំឡើងពន្ធសម្រាប់ផលិតផលកសិ-ចំណីអាហារជាច្រើនមុខ របស់សហរដ្ឋអាមេរិកដែលចូលទៅក្នុងទីផ្សារសហភាពអឺរ៉ុប។ ជាថ្នូរមកវិញ ទីក្រុងវ៉ាស៊ីនតោន នឹងកំណត់កម្រិតដំឡើងពន្ធ១៥ភាគរយលើទំនិញភាគច្រើនរបស់សហភាពអឺរ៉ុបដែលនាំចេញទៅកាន់សហរដ្ឋអាមេរិក។