អនុរដ្ឋមន្ត្រីក្រសួងពាណិជ្ជកម្មចិន លោក Yan Dong បានថ្លែងនៅក្នុងសន្និសីទសារព័ត៌មានមួយថា អាជ្ញាធរចិន នឹងពង្រឹងកិច្ចខិតខំប្រឹងប្រែង ក្នុងការកែទម្រង់អង្គការពាណិជ្ជកម្មពិភពលោក (WTO) និងធ្វើឲ្យសេដ្ឋកិច្ចពិភពលោកមានស្ថិរភាព នៅក្នុងឆ្នាំ ២០២៦នេះ។  

លោកបាននិយាយថា៖«ឆ្នាំ ២០២៦ គឺជាឆ្នាំគម្រប់ ២៥ឆ្នាំ ចាប់តាំងពីប្រទេសចិនបានចូលជាសមាជិក WTO។ យើងបានឆ្លងកាត់ដំណាក់កាលដ៏វែងឆ្ងាយពីការទទួលយកដោយស្មោះត្រង់ និងធ្វើតាមច្បាប់របស់អង្គការនេះ ទៅជាការចូលរួមយ៉ាងសកម្ម និងធ្វើការរួមចំណែកដ៏សំខាន់របស់យើង។ ចាប់ពីពេលនេះតទៅ ប្រទេសចិន នឹងចូលរួមក្នុង WTO កាន់តែសកម្ម និងបើកចំហ»។

លោកអនុរដ្ឋមន្ត្រី បានកត់សម្គាល់ថា នៅឆ្នាំ ២០២៥ ពាណិជ្ជកម្មពិភពលោក «កំពុងឆ្លងកាត់ពេលវេលាដ៏ច្របូកច្របល់ និងជួបប្រទះបញ្ហាប្រឈមសំខាន់ៗ»។ ក្នុងស្ថានភាពនេះ ប្រទេសចិន «កំពុងចាត់វិធានការជាក់ស្តែងយ៉ាងសកម្ម ដើម្បីរក្សាស្ថិរភាពពាណិជ្ជកម្មអន្តរជាតិ និងសណ្តាប់ធ្នាប់សេដ្ឋកិច្ច»។ 

មន្ត្រីរូបនេះបាននិយាយថា៖«យើងចូលរួមយ៉ាងសកម្មក្នុងការកែទម្រង់អង្គការពាណិជ្ជកម្មពិភពលោក (WTO)។ ប្រទេសចិនបានដាក់ចេញនូវសំណើ និងគំនិតផ្តួចផ្តើមនានា នៅក្នុងអង្គការនេះទាក់ទងនឹងការការពារគោលការណ៍ជាមូលដ្ឋានដូចជាការមិនរើសអើង។ យើងបានស្នើឡើងនូវវិធីសាស្រ្តធ្វើការដែលផ្តល់អាទិភាពដល់ស្ថិរភាព ការអភិវឌ្ឍ និងកំណែទម្រង់ ហើយរឿងនេះបានទទួលការឆ្លើយតបជាវិជ្ជមានពីរដ្ឋជាសមាជិកជាច្រើន»។  

យោងតាមលោកអនុរដ្ឋមន្ត្រី ទីក្រុងប៉េកាំងកំពុងចូលរួមក្នុងការពិគ្រោះយោបល់ផ្សេងៗទាក់ទងនឹងកំណែទម្រង់អង្គការនេះ និង «គាំទ្រដល់កិច្ចខិតខំប្រឹងប្រែង ដើម្បីបង្កើនប្រសិទ្ធភាពមុខងាររបស់ខ្លួន»។ លោកបានគូសបញ្ជាក់ពីតម្រូវការសម្រាប់កំណែទម្រង់ដែលត្រូវអនុវត្ត «ក្នុងទិសដៅត្រឹមត្រូវ»៕