រដ្ឋមន្ត្រីការបរទេសកាតា លោក Mohammed bin Abdulaziz Al-Khulaifi កាលពីថ្ងៃចន្ទ បានបញ្ជាក់ជាថ្មីអំពីការគាំទ្ររបស់ទីក្រុងដូហាចំពោះប្រទេសលីបង់ ក្នុងអំឡុងពេលជួបជាមួយលោកប្រធានាធិបតី Joseph Aoun។

នៅក្នុងសន្និសីទសារព័ត៌មានមួយ លោកបាននិយាយថា “ស្ថិរភាពរបស់ប្រទេសលីបង់ គឺជាសសរស្តម្ភជាមូលដ្ឋានសម្រាប់ស្ថិរភាពរបស់តំបន់ទាំងមូល» ហើយបានប្រកាសពីកញ្ចប់វិធានការសេដ្ឋកិច្ច អភិវឌ្ឍន៍ និងមនុស្សធម៌។

ដំណើរទស្សនកិច្ចរបស់រដ្ឋមន្ត្រីកាតាទៅកាន់ទីក្រុងបេរូត បានកើតឡើងស្របគ្នានឹងការបង្កើនកិច្ចប្រតិបត្តិការយោធារបស់អ៊ីស្រាអែល នៅភាគខាងត្បូងប្រទេសលីបង់ រួមទាំងការធ្វើឃាតសមាជិករបស់ក្រុមហេសបូឡា ដោយយានដ្រូន ការឈ្លានពានចូលទៅក្នុងតំបន់ព្រំដែន និងការរុះរើលំនៅឋានបន្ថែមទៀត។

ខណៈពេលដែលកាលបរិច្ឆេទសម្រាប់កិច្ចប្រជុំនៃកិច្ចព្រមព្រៀងគណៈកម្មាធិការត្រួតពិនិត្យបទឈប់បាញ់ មិនទាន់ត្រូវបានបញ្ជាក់នៅឡើយទេ ស្ថានទូតសហរដ្ឋអាមេរិកប្រចាំប្រទេសលីបង់ បាននិយាយនៅក្នុងសេចក្តីប្រកាសព័ត៌មានមួយកាលពីថ្ងៃចន្ទថា ឯកអគ្គរដ្ឋទូតរបស់ទីក្រុងវ៉ាស៊ីនតោនប្រចាំទីក្រុងបេរូត និងអ៊ីស្រាអែល បានជួបប្រជុំគ្នា នៅប្រទេសហ្ស៊កដានី ដើម្បីពិភាក្សាអំពីកិច្ចខិតខំប្រឹងប្រែងសន្តិភាពតាមរយៈការទូត និងការសន្ទនា។

កិច្ចប្រជុំនេះ ដែលរៀបចំដោយស្ថានទូតសហរដ្ឋអាមេរិកប្រចាំទីក្រុងអាម៉ាន់ កាលពីចុងសប្តាហ៍មុន បានផ្តោតលើជំហានចាំបាច់ ដើម្បីសម្រេចបាននូវតំបន់ដែលមានសន្តិភាព និងវិបុលភាពជាងមុន៕