ទិន្នន័យជើងហោះហើរ បានបង្ហាញកាលពីថ្ងៃចន្ទ (ទី២៦ ខែមករា ឆ្នាំ២០២៦) ថា ជើងហោះហើរដែលបានកំណត់ពេលទាំងអស់ នៅលើផ្លូវអាកាសចំនួន ៤៩ រវាងប្រទេសចិន និងជប៉ុន ត្រូវបានលុបចោលសម្រាប់ខែកុម្ភៈ ខណៈដែលក្រុមហ៊ុនអាកាសចរណ៍ចិន បានពង្រីកគោលនយោបាយផ្លាស់ប្តូរសំបុត្រពិសេស និងគោលនយោបាយសងប្រាក់វិញ សម្រាប់ការធ្វើដំណើរទាក់ទងនឹងជប៉ុន។

ទិន្នន័យពីវេទិកាព័ត៌មានជើងហោះហើរ Flight Master បានបង្ហាញថា គិតត្រឹមថ្ងៃទី២៦ ខែមករា ផ្លូវហោះហើរចំនួន ៤៩ រវាងប្រទេសចិន និងជប៉ុន បានលុបចោលជើងហោះហើរទាំងអស់ដែលត្រូវបានគ្រោង សម្រាប់ខែកុម្ភៈ ដែលជាការកើនឡើងពីកម្រិតលុបចោលខែមករា។ ក្នុងខែមករានេះ អត្រាលុបចោល សម្រាប់ជើងហោះហើរ ពីចិនដីគោកទៅកាន់ជប៉ុន គឺ ៤៧,២ភាគរយ ដោយកើនឡើង ៧,៨ភាគរយ កាលពីខែធ្នូឆ្នាំមុន។

ក្រុមហ៊ុនអាកាសចរណ៍ក្នុងស្រុកធំៗចំនួន ៣ របស់ចិន គឺ Air China, China Eastern Airlines និង China Southern Airlines បានចេញសេចក្តីជូនដំណឹងកាលពីថ្ងៃទី២៦ ខែមករា ដែលរៀបរាប់លម្អិត អំពីនីតិវីធីដោះស្រាយពិសេស សម្រាប់សំបុត្រនៅលើផ្លូវហោះហើរទៅ និងមកពីជប៉ុន ដោយដកស្រង់ការរំលឹកការធ្វើដំណើរដែលចេញដោយក្រសួងការបរទេសចិន។

គួរបញ្ជាក់ថា ប្រទេសចិនបានចេញសេចក្តីណែនាំ អំពីការធ្វើដំណើរ កាលពីពាក់កណ្តាលខែវិច្ឆិកាឆ្នាំមុន ដោយបានជំរុញកុំឲ្យធ្វើដំណើរទៅជប៉ុន បន្ទាប់ពីមានការកត់សម្គាល់របស់នាយករដ្ឋមន្ត្រីជប៉ុន លោកស្រី Sanae Takaichi ទាក់ទងនឹងបញ្ហាកោះតៃវ៉ាន់។ ចាប់តាំងពីពេលនោះមក ក្រុមហ៊ុនអាកាសចរណ៍ចិនបានកែសម្រួលសមត្ថភាពឡើងវិញនៅលើផ្លូវហោះហើរទៅ និងមកពីជប៉ុន ដោយការកាត់បន្ថយផ្តោតលើសេវាកម្ម ពាក់ព័ន្ធនឹងការដើរលេងកម្សាន្ត៕