មន្ត្រីជាន់ខ្ពស់អាមេរិក បាននិយាយថា ការបង្កើតរដ្ឋាភិបាលអ៊ីរ៉ាក់ដែលបន្តកិច្ចសហប្រតិបត្តិការជាមួយបណ្ដាប្រទេសជិតខាង និងលោកខាងលិច ហើយមិនត្រូវបានគ្រប់គ្រងដោយអ៊ីរ៉ង់ គឺមានសារៈសំខាន់ណាស់ ចំពោះស្ថិរភាព និងវិបុលភាព ក្នុងតំបន់។

ការអត្ថាធិប្បាយទាំងនេះកើតឡើង ស្របពេលមានក្ដីបារម្ភកាន់តែខ្លាំងឡើងៗ នៅក្នុងទីក្រុងវ៉ាស៊ីនតោន អំពីការតែងតាំងអតីតនាយករដ្ឋមន្ត្រី លោក Nouri al-Maliki ជាបេក្ខជន សម្រាប់តំណែងនាយករដ្ឋមន្ត្រីរបស់ក្រុមចម្រុះ។ រដ្ឋមន្ត្រីការបរទេសអាមេរិក លោក Marco Rubio និងបេសកជនពិសេសអាមេរិក លោក Tom Barrack បានអំពាវនាវឲ្យមានរដ្ឋបាលឯករាជ្យ និងបរិយាបន្ន នៅក្នុងប្រទេសអ៊ីរ៉ាក់។

អំឡុងការជជែកតាមទូរស័ព្ទថ្មីៗនេះ ជាមួយនាយករដ្ឋមន្ត្រីជិតផុតអាណត្តិ លោក Mohammed Shia al-Sudani លោក Rubio បានសង្កត់ធ្ងន់ថា រដ្ឋាភិបាលដែលមានស្ថិរភាពត្រូវតែផ្តល់អាទិភាពដល់ផលប្រយោជន៍ជាតិ បញ្ចៀសជម្លោះក្នុងតំបន់ និងរក្សាភាពជាដៃគូដែលផ្តល់ផលប្រយោជន៍ឲ្យគ្នាទៅវិញទៅមក រវាងសហរដ្ឋអាមេរិក និងអ៊ីរ៉ាក់។

លោក Rubio បានព្រមានថា រដ្ឋាភិបាលដែលគ្រប់គ្រងដោយអ៊ីរ៉ង់ មិនអាចយកផលប្រយោជន៍របស់អ៊ីរ៉ាក់មុនបានឡើយ មិនអាចធ្វើឲ្យប្រទេសនេះនៅឆ្ងាយពីជម្លោះក្នុងតំបន់បានឡើយ ឬមិនអាចជំរុញភាពជាដៃគូ រវាងសហរដ្ឋអាមេរិក និងអ៊ីរ៉ាក់បានទេ។

ចំណែកលោក Barrack បានបន្ទរនូវគោលជំហរនេះ តាមរយៈការបង្ហោះថ្មីៗ នៅលើបណ្ដាញសង្គម X ដោយសង្កត់ធ្ងន់ពីសារៈសំខាន់នៃការរក្សាទំនាក់ទំនងសហប្រតិបត្តិការជាមួយដៃគូលោកខាងលិច និងតំបន់ ដើម្បីធានាបាននូវស្ថិរភាព និងវិបុលភាពរយៈពេលវែង។

គួរបញ្ជាក់ថា សភាអ៊ីរ៉ាក់គ្រោងនឹងបោះឆ្នោតជ្រើសរើសប្រធានាធិបតីថ្មី នៅថ្ងៃទី២៧ ខែមករានេះ។ បន្ទាប់មក ប្រធានាធិបតី នឹងប្រគល់ភារកិច្ចឲ្យបុគ្គលត្រូវបានតែងតាំងជានាយករដ្ឋមន្ត្រីមកពីប្លុកធំបំផុតជាងគេ បង្កើតរដ្ឋាភិបាលក្នុងរយៈពេល ១៥ថ្ងៃ៕