រលកកម្ដៅដ៏ធំមួយ នៅទូទាំងភាគអាគ្នេយ៍របស់ប្រទេសអូស្ត្រាលី បានបង្កើនការគំរាមកំហែងឲ្យមានចំហេះព្រៃកាន់តែខ្លាំងឡើងៗ ដោយទីក្រុង Melbourne ត្រូវបានព្យាករថា នឹងកត់ត្រាថ្ងៃក្តៅបំផុតរបស់ខ្លួនជាលើកដំបូង ក្នុងរយៈពេលជិត ១៧ឆ្នាំ នៅថ្ងៃអង្គារ (ទី២៧ ខែមករា ឆ្នាំ២០២៦) ហើយប្រជាជនរាប់រយនាក់ នៅក្នុងទីក្រុងជនបទ ត្រូវបានបញ្ជាឲ្យជម្លៀសចេញពីផ្ទះសម្បែងរបស់ពួកគេជាបន្ទាន់។

ការិយាល័យឧតុនិយមអូស្ត្រាលី បានឲ្យដឹងថា សីតុណ្ហភាពនៅទីក្រុង Melbourne អាចឡើងដល់ ៤៥អង្សាសេ ដោយស្ថានភាពរលកកម្ដៅពីខ្លាំង ទៅកាន់តែខ្លាំងឡើងង ត្រូវបានគេរំពឹងថា នឹងឡើងដល់កម្រិតក្ដៅខ្លាំងបំផុត នៅថ្ងៃអង្គារ និងថ្ងៃពុធ មុនពេលថយចុះបន្តិចម្តងៗ នៅចុងសប្តាហ៍នេះ។

រលកកម្ដៅនេះ បានធ្វើឲ្យគ្រោះថ្នាក់ចំហេះព្រៃកាន់តែខ្លាំងក្លា នៅទូទាំងរដ្ឋ Victoria ជារដ្ឋដែលមានប្រជាជនច្រើនបំផុតទី២ របស់ប្រទេសអូស្ត្រាលី ជាទីដែលចំហេះឆេះព្រៃឆាបឆេះយ៉ាងលឿននៅក្នុងតំបន់ Otways បានដុតបំផ្លាញផ្ទៃដីប្រហែល ១០.០០០ហិកតា។

ក្រុមមន្ត្រីបានព្រមានថា ការព្យាករពីការមានខ្យល់បក់ខ្លាំង សម្រាប់យប់ថ្ងៃនេះ អាចធ្វើឲ្យអណ្តាតភ្លើងរាលដាលបន្ថែមទៀត ដោយគំរាមកំហែងដល់ផ្ទះសម្បែងជាច្រើនខ្នង។

លោក Jason Heffernan ប្រធានអាជ្ញាធរពន្លត់អគ្គិភ័យប្រចាំប្រទេស បានប្រាប់ប្រព័ន្ធផ្សព្វផ្សាយ ABC News ថា៖ «វាជាការប្រែប្រួលដែលនឹងកើតឡើងនៅម៉ោងប្រហែល ៥ល្ងាច (ម៉ោងក្នុងស្រុក) ដោយមានខ្យល់បក់ខ្លាំងគួរសម ដែលទំនងជាបង្កការខូចខាតភាគច្រើន និងធ្វើឲ្យចំហេះកាន់តែខ្លាំងបន្ថែមទៀត»។

លោក Heffernan បានបន្ថែមថា សេវាសង្គ្រោះបន្ទាន់ បានប្រាប់អ្នកស្រុកពីផ្ទះមួយទៅផ្ទះមួយ ប្រហែល ១.១០០ខ្នង និងបានផ្ញើសារជាអក្សរទៅកាន់ទូរសព្ទប្រហែល ១០.០០០គ្រឿង ដោយជំរុញឲ្យពួកគាត់ចាកចេញពីតំបន់នេះ។ បម្រាមអគ្គិភ័យទាំងស្រុង ត្រូវបានប្រកាសនៅទូទាំងរដ្ឋ Victoria ខណៈដែលមន្ត្រីបានព្យាយាមកាត់បន្ថយហានិភ័យពីចំហេះថ្មី៕