មជ្ឈមណ្ឌលព័ត៌មានគុណភាពខ្យល់ទីក្រុងបាងកក នៅម៉ោង ៧ព្រឹក (ម៉ោងក្នុងស្រុក) នាថ្ងៃអង្គារ (ទី២៧ ខែមករា ឆ្នាំ២០២៦) នេះ បានរាយការណ៍ថា កម្រិតកំហាប់ភាគល្អិតនិចល (PM2.5) កើនឡើងខ្ពស់ នៅទូទាំងទីក្រុងបាងកករបស់ប្រទេសថៃ។

គុណភាពខ្យល់ នាពេលព្រឹក មានសភាពអាក្រក់ខ្លាំង ដោយភាគល្អិត PM2.5 ឡើងលើសពីស្តង់ដារសុវត្ថិភាពនៅគ្រប់តំបន់ដែលត្រូវបានត្រួតពិនិត្យ។ 

កម្រិតខ្ពស់បំផុតត្រូវបានកត់ត្រា នៅតំបន់ Bang Rak, Nong Khaem និង Sai Mai។ អ្នកស្រុកត្រូវបានណែនាំឲ្យពាក់ម៉ាស់ការពារភាគល្អិត PM2.5 នៅពេលចេញទៅខាងក្រៅ តាមដានរោគសញ្ញា និងស្វែងរកការព្យាបាលពីគ្រូពេទ្យជាបន្ទាន់ ប្រសិនបើមានសញ្ញាមិនប្រក្រតីលេចឡើង។

កម្រិតភាគល្អិត PM2.5 ជាមធ្យម ទូទាំងទីក្រុង គឺ ៥៥,២មីក្រូក្រាម ក្នុងមួយម៉ែត្រគូបខ្យល់ ដោយលើសពីស្តង់ដារសុវត្ថិភាព ដែលមិនឲ្យលើសពី ៣៧,៥មីក្រូក្រាម ក្នុងមួយម៉ែត្រគូបខ្យល់។

ជារួម កម្រិត PM2.5 ត្រូវបានរាយការណ៍ថា កំពុងកើនឡើងជាលំដាប់ ដោយគុណភាពខ្យល់ត្រូវបានវាយតម្លៃថា «ចាប់ផ្តើមប៉ះពាល់ដល់សុខភាព» (កម្រិតពណ៌ទឹកក្រូច) នៅទូទាំងរាជធានីមួយនេះ៕