មន្ត្រីអាមេរិកម្នាក់ បាននិយាយកាលពីថ្ងៃចន្ទ (ទី២៦ ខែមករា ឆ្នាំ២០២៦) ថា សហរដ្ឋអាមេរិក «បើកចំហ សម្រាប់អាជីវកម្ម» ប្រសិនបើអ៊ីរ៉ង់ចង់ទាក់ទងទីក្រុងវ៉ាស៊ីនតោន ខណៈដែលសហរដ្ឋអាមេរិក កំពុងព្យាយាមដាក់សម្ពាធលើទីក្រុងតេអេរ៉ង់ ពាក់ព័ន្ធនឹងការបង្ក្រាបរបស់រដ្ឋាភិបាលលើក្រុមបាតុករ។

នៅពេលត្រូវសួរអំពីលក្ខខណ្ឌនៃការចរចាជាមួយអ៊ីរ៉ង់ មន្ត្រីរូបនេះបានប្រាប់អ្នកសារព័ត៌មានថា៖ «ខ្ញុំគិតថាពួកគេដឹងពីលក្ខខណ្ឌ។ ពួកគេដឹងពីលក្ខខណ្ឌនោះ»។

ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍សប្ដាហ៍មុនថា សហរដ្ឋអាមេរិក បញ្ជូន «កងនាវា» ឆ្ពោះទៅកាន់អ៊ីរ៉ង់ហើយ ប៉ុន្តែសង្ឃឹមថា លោកនឹងមិនចាំបាច់ប្រើប្រាស់វាទេ ខណៈដែលលោកបានបន្តការព្រមានដល់ទីក្រុងតេអេរ៉ង់កុំឲ្យសម្លាប់ក្រុមបាតុករ ឬចាប់ផ្តើមកម្មវិធីនុយក្លេអ៊ែររបស់ខ្លួនឡើងវិញ។

លោក Trump បានគំរាមម្តងហើយម្តងទៀតថា នឹងធ្វើអន្តរាគមន៍ ប្រសិនបើអ៊ីរ៉ង់បន្តសម្លាប់ក្រុមបាតុករ ប៉ុន្តែបាតុកម្មទូទាំងប្រទេស បានថយចុះចាប់តាំងពីពេលនោះមក។ លោកប្រធានាធិបតី បាននិយាយថា លោកត្រូវបានគេប្រាប់ថា ការសម្លាប់កំពុងថយចុះ ហើយលោកជឿថា បច្ចុប្បន្នមិនមានផែនការ សម្រាប់ការប្រហារជីវិតអ្នកទោសនោះទេ៕