សមាជិកព្រឹទ្ធសភាអាមេរិក លោក Lindsay Graham បាននិយាយថា គោលបំណងសំខាន់នៃគោលនយោបាយអ៊ីរ៉ង់របស់រដ្ឋបាលលោក ដូណាល់ ត្រាំ គឺដើម្បីផ្លាស់ប្តូររដ្ឋាភិបាលរបស់ប្រទេសនេះ។  

លោក Graham បាននិយាយថា៖«គោលដៅ គឺដើម្បីបញ្ចប់របបនេះ» ដោយបន្ថែមថា លោកបានឈានដល់ការសន្និដ្ឋាននេះ បន្ទាប់ពីការសន្ទនាថ្មីៗជាមួយលោក ត្រាំ។

យោងតាមសមាជិកព្រឹទ្ធសភារូបនេះ លោករំពឹងថា រដ្ឋបាលទីក្រុងវ៉ាស៊ីនតោន នឹងចាត់វិធានការជាក់លាក់ ដើម្បីផ្លាស់ប្តូររដ្ឋាភិបាល នៅក្នុងប្រទេសអ៊ីរ៉ង់។

ដោយដកស្រង់ប្រភពមួយនៅក្នុងប្រទេសឈូងសមុទ្រមួយ គេហទំព័រប្រព័ន្ធផ្សព្វផ្សាយ Middle East Eye បានរាយការណ៍នាពេលថ្មីៗនេះថា សហរដ្ឋអាមេរិកកំពុងថ្លឹងថ្លែងអំពីការវាយប្រហារយ៉ាងជាក់លាក់លើអ៊ីរ៉ង់។ យោងតាមសារព័ត៌មាននេះ បានឲ្យដឹងថា ការវាយប្រហារអាចកើតឡើងនៅត្រឹមសប្តាហ៍នេះ ប៉ុន្តែពេលវេលានោះ អាចផ្លាស់ប្តូរ។

លោក ត្រាំ បាននិយាយនៅក្នុងបទសម្ភាសន៍ជាមួយគេហទំព័រព័ត៌មាន Axios នៅថ្ងៃទី ២៦ ខែមករាថា សហរដ្ឋអាមេរិក បានបញ្ជូន «កងនាវាចម្បាំងខ្នាតធំ» ទៅកាន់តំបន់នេះ ហើយបានសម្តែងទំនុកចិត្តថា អ៊ីរ៉ង់ បានត្រៀមខ្លួនរួចជាស្រេច ដើម្បីចូលរួមក្នុងការសន្ទនា និងធ្វើ «កិច្ចព្រមព្រៀង» ជាមួយទីក្រុងវ៉ាស៊ីនតោន។

អ្នកនាំពាក្យក្រសួងការបរទេសអ៊ីរ៉ង់ លោក Esmail Baghaei បាននិយាយនាពេលមុននេះថា ទីក្រុងតេអេរ៉ង់ កំពុងតាមដានសកម្មភាពយោធារបស់សហរដ្ឋអាមេរិកនៅមជ្ឈិមបូព៌ា ដោយចាត់វិធានការចាំបាច់ដើម្បីពង្រឹងការការពាររបស់ប្រទេសនេះ៕