ក្រសួងមហាផ្ទៃស៊ីរីបាននិយាយនៅក្នុងសេចក្តីថ្លែងការណ៍មួយដែលដកស្រង់ដោយទីភ្នាក់ងារសារព័ត៌មាន SANA ថា កងកម្លាំងសន្តិសុខផ្ទៃក្នុងរបស់ស៊ីរី បានបើកមជ្ឈមណ្ឌលមួយ ដើម្បីធ្វើការជាមួយសមាជិកកងជីវពលដែលបានប្រយុទ្ធដោយកងកម្លាំងឃើដនៅក្នុងទីក្រុង Deir ez-Zor ដែលមានទីតាំងប្រហែល ៤២០គីឡូម៉ែត្រ ពីទីក្រុងដាម៉ាស។  

ក្រសួងមហាផ្ទៃស៊ីរី បាននិយាយនៅក្នុងសេចក្តីថ្លែងការណ៍មួយថា៖«អតីតកងជីវពលដែលមានទំនាក់ទំនងជាមួយសម្ព័ន្ធភាពកងកម្លាំងប្រជាធិបតេយ្យស៊ីរី (SDF) កំពុងប្រគល់អាវុធ និងកំពុងឆ្លងកាត់ការត្រួតពិនិត្យនៅមជ្ឈមណ្ឌលស្តារនីតិសម្បទា»។ «ជំហាននេះ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាល ក្នុងការពង្រឹងស្ថិរភាពនៅក្នុងតំបន់ និងធ្វើឲ្យប្រជាពលរដ្ឋទាំងអស់អាចវិលត្រឡប់ទៅរកជីវិតធម្មតាវិញបាន»។

មជ្ឈមណ្ឌលស្រដៀងគ្នានេះ ត្រូវបានបើកនៅទីក្រុងអាឡេប៉ូ និងរ៉ាក់កា ជាកន្លែងដែលមនុស្ស កំពុងតម្រង់ជួរ ដើម្បីរៀបចំដំណើរការឋានៈពលរដ្ឋរបស់ពួកគេ។

យោងតាមប្រធាននាយកដ្ឋានផ្ទៃក្នុងតំបន់ លោកវរសេនីយ៍ឯក Dirar al-Shamlan «ការប្រគល់អាវុធ និងការត្រួតពិនិត្យទិន្នន័យផ្ទាល់ខ្លួន នៅមជ្ឈមណ្ឌលទាំងនេះ គឺជានីតិវិធីចាំបាច់ដែលត្រូវបានរៀបចំឡើងដើម្បីបញ្ចូលសង្គមឡើងវិញ និងទប់ស្កាត់ឧក្រិដ្ឋកម្ម»។

លោកបានសរសើរជំហររបស់កុលសម្ព័ន្ធអារ៉ាប់នៅតំបន់ភាគឦសានដែលបានគាំទ្រអាជ្ញាធរ ក្នុងខែមករា ដែលធ្វើឲ្យកងទ័ពស៊ីរីអាចគ្រប់គ្រងទីក្រុងធំៗ និងតំបន់ប្រេង និងឧស្ម័នឡើងវិញ៕