សារព័ត៌មាន Financial Times ( FT) បានរាយការណ៍នៅថ្ងៃអង្គារនេះថា អ៊ីស្រាអែលកំពុងរៀបចំសម្រាប់ការចរចាជាមួយរដ្ឋបាលលោក ត្រាំ អំពីកិច្ចព្រមព្រៀងសន្តិសុខថ្មីរយៈពេល ១០ ឆ្នាំ ដោយស្វែងរកការពង្រីកការគាំទ្រយោធារបស់សហរដ្ឋអាមេរិក ទោះបីជាមេដឹកនាំអ៊ីស្រាអែលបង្ហាញថា ពួកគេកំពុងរៀបចំផែនការសម្រាប់អនាគត ជាមួយនឹងការកាត់បន្ថយជំនួយជាសាច់ប្រាក់របស់អាមេរិកក៏ដោយ។  

ថ្លែងទៅកាន់កាសែត FT មុនពេលលាលែងពីតំណែងជាទីប្រឹក្សាហិរញ្ញវត្ថុជាន់ខ្ពស់របស់ក្រសួងយោធា និងការពារជាតិអ៊ីស្រាអែល លោក Gil Pinchas បាននិយាយថា អ៊ីស្រាអែលនឹងស្វែងរកការផ្តល់អាទិភាពដល់គម្រោងយោធា និងការពារជាតិរួមគ្នាជាជាងការផ្តល់សាច់ប្រាក់នៅក្នុងការចរចាដែលលោករំពឹងថានឹងធ្វើឡើង នៅប៉ុន្មានសប្តាហ៍ខាងមុខនេះ។

ក្រសួងការបរទេសសហរដ្ឋអាមេរិក មិនបានឆ្លើយតបភ្លាមៗចំពោះសំណើរបស់សារព័ត៌មានរ៉យទ័រ សម្រាប់ការអត្ថាធិប្បាយនៅខាងក្រៅម៉ោងធ្វើការធម្មតានោះទេ។

លោក Pinchas បានប្រាប់ FT ថា៖«ភាពជាដៃគូ គឺសំខាន់ជាងបញ្ហាហិរញ្ញវត្ថុសុទ្ធ នៅក្នុងបរិបទនេះ ... មានរឿងជាច្រើនដែលស្មើនឹងប្រាក់»។ "ទស្សនៈអំពីរឿងនេះ ត្រូវតែទូលំទូលាយជាងនេះ»។

លោក Pinchas បាននិយាយថា ការគាំទ្រផ្នែកហិរញ្ញវត្ថុសុទ្ធសាធ ឬ «ជំនួយឥតសំណង» ដែលមានតម្លៃ ៣,៣ ពាន់លានដុល្លារក្នុងមួយឆ្នាំ ដែលអ៊ីស្រាអែលអាចប្រើប្រាស់ ដើម្បីទិញអាវុធរបស់សហរដ្ឋអាមេរិក គឺជា «សមាសធាតុមួយនៃអនុស្សរណៈនៃការយោគយល់គ្នា (ដែល) អាចនឹងថយចុះបន្តិចម្តងៗ»៕