អ្នកបោះឆ្នោត នៅថ្ងៃអង្គារ (ទី២៧ ខែមករា ឆ្នាំ២០២៦) នេះ បានបង្ហាញទាំងការសរសើរ និងកំហឹង ចំពោះនាយករដ្ឋមន្ត្រីជប៉ុន លោកស្រី Sanae Takaichi ខណៈដែលលោកស្រីបានថ្លែងសុន្ទរកថាផ្ទាល់លើកដំបូងរបស់លោកស្រី នៅទីក្រុងតូក្យូ ដើម្បីចាប់ផ្តើមយុទ្ធនាការផ្លូវការ សម្រាប់ការបោះឆ្នោតសកល នៅថ្ងៃទី៨ ខែកុម្ភៈ។

លោក Kiyoshi Sekiguchi វ័យ ៨១ឆ្នាំ បាននិយាយថា កាលពីមុន លោកបានបោះឆ្នោតឲ្យគណបក្ស ដែលកំពុងកាន់អំណាច គឺប្រជាធិបតេយ្យសេរីនិយម (LDP) របស់លោកស្រី Takaichi ប៉ុន្តែថា សុន្ទរកថានាពេលព្រឹករបស់នាយករដ្ឋមន្ត្រីទៅកាន់ហ្វូងមនុស្សដ៏ច្រើនកុះករ នៅក្នុងតំបន់ Akihabara នៃទីក្រុងតូក្យូ គឺជាលើកទីមួយហើយ ដែលលោកបានឃើញអ្នកនយោបាយនិយាយផ្ទាល់បែបនេះ។ លោកបាននិយាយថា «គណបក្ស LDP ពីមុនមិនល្អប៉ុន្មានទេ ប៉ុន្តែដោយមានលោកស្រី Takaichi វាគឺខុសប្លែក»។

ក្នុងនាមជាគាំទ្រសន្តិសុខជាតិយ៉ាងម៉ឺងម៉ាត់ លោកស្រី Takaichi បានប្រកាសការបោះឆ្នោតមុនអាណត្តិ ស្របពេលមានការគាំទ្រខ្ពស់ សម្រាប់រដ្ឋាភិបាលដែលទើបមានអាយុប៉ុន្មានខែរបស់លោកស្រី។ លោកស្រីកំពុងមានគោលបំណងបង្កើនសំឡេងភាគច្រើនដ៏ស្ដួចស្តើងរបស់រដ្ឋាភិបាលចម្រុះរបស់លោកស្រី នៅក្នុងសភាតំណាងរាស្ត្រដ៏មានឥទ្ធិពល ប៉ុន្តែការប្រកាសនេះបានទាក់ទាញឲ្យមានការរិះគន់ថា បានពន្យារវិធានការជួយគាំទ្រដល់គ្រួសារដែលរងផលប៉ះពាល់ដោយអតិផរណា។

លោក Sekiguchi បាននិយាយថា វាគឺជា «ពេលវេលាដ៏ល្អណាស់» ក្នុងការប្រកាសរៀបចំការបោះឆ្នោត ឥឡូវនេះ។ ដោយចង្អុលបង្ហាញពីក្ដីបារម្ភ អំពីសន្តិសុខជាតិ និងតម្រូវការ ដើម្បីឲ្យមានវិធានការឆ្លើយតបទៅនឹងក្ដីកង្វល់របស់អ្នកបោះឆ្នោត ពាក់ព័ន្ធនឹងចំនួនប្រជាជនបរទេសកើនឡើង លោកបានបញ្ជាក់ថា៖ «លោកស្រីមិនត្រូវខ្ជះខ្ជាយពេលវេលាទេ។ រឿងល្អៗ អំពីប្រទេសជប៉ុន អាចនឹងបាត់ទៅវិញ ប្រសិនបើលោកស្រីពន្យារពេល»។

ប៉ុន្តែទោះជាយ៉ាងនេះក៏ដោយ ក៏មានអ្នកផ្សេងទៀតចេញមកបង្ហាញការជំទាស់ ចំពោះពេលវេលានៃការបោះឆ្នោតនេះ ដែលនឹងធ្វើឡើងនៅក្នុងខែកុម្ភៈជាលើកដំបូង ចាប់តាំងពីឆ្នាំ១៩៩០។ អ្នកគាំទ្រគណបក្ស LDP វ័យ ៥៧ឆ្នាំម្នាក់ ដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ដោយខ្លីៗថា គាត់ «មិនអាចមើលឃើញអត្ថន័យអ្វី» នៅពីក្រោយការរំលាយសភានេះនោះទេ៕