យោងតាមមន្ត្រីមូលដ្ឋាន និងរបាយការណ៍ព័ត៌មានបានឱ្យដឹងថា មនុស្សយ៉ាងហោចណាស់ ៤៥នាក់ បានស្លាប់ នៅទូទាំងរដ្ឋចំនួន១៤ របស់សហរដ្ឋអាមេរិក គិតត្រឹមថ្ងៃអង្គារ (២៧ មករា) ដោយសារព្យុះរដូវរងាដ៏ខ្លាំងក្លាមួយ ដែលបានធ្វើឱ្យតំបន់ភាគច្រើននៃរដ្ឋភាគកណ្តាល និងភាគខាងកើតសហរដ្ឋអាមេរិក ត្រូវបានគ្របដណ្ដប់ដោយព្រិល ទឹកកក និងសីតុណ្ហភាពទាបជាងកម្រិតកកទៅទៀត។

ព្យុះនេះបានចាប់ផ្តើមវិវត្តនៅថ្ងៃសុក្រសប្ដាហ៍មុន ហើយបានទម្លាក់ព្រិលយ៉ាងក្រាស់ឃ្មឹកពាសពេញតំបន់ដ៏ធំទូលាយកាលពីចុងសប្តាហ៍កន្លងទៅ ហើយអ្នកឧតុមនិយមបាននិយាយថា មនុស្សជិត ២០០ លាននាក់ បន្តស្ថិតនៅក្រោមការព្រមានពីស្ថានភាពត្រជាក់ដ៏កំណាចក្នុងរដូវរងា យ៉ាងហោចណាស់រហូតដល់ថ្ងៃទី១ ខែកុម្ភៈ ពោលគឺពេញមួយសប្ដាហ៍នេះ។ ព្រិលបានធ្វើឱ្យចរាចរណ៍ផ្លូវគោកកកស្ទះយ៉ាងខ្លាំង និងនាំឱ្យមានការលុបចោលជើងហោះហើរយ៉ាងទូលំទូលាយ និងការដាច់ចរន្តអគ្គិសនីទ្រង់ទ្រាយធំ ដែលបានស្រាកស្រាន្តខ្លះកាលពីថ្ងៃចន្ទ ប៉ុន្តែនៅតែបន្សល់ទុកនូវភាពត្រជាក់ខ្លាំង ដែលត្រូវបានរំពឹងថានឹងបន្តអូសបន្លាយថែមទៀត។

គិតត្រឹមថ្ងៃអង្គារដដែលនេះ ទីក្រុងនានាកំពុងចល័តក្រុមឆ្លើយតបបន្ទាន់និងធនធាន ដើម្បីធានាថា ប្រជាពលរដ្ឋ ជាពិសេសជនគ្មានផ្ទះសម្បែង មានសុវត្ថិភាពក្នុងអាកាសធាតុដ៏អាប់អួ ខណៈលំនៅឋាន និងអាជីវកម្មជាង ៥៥ម៉ឺនកន្លែង ទូទាំងប្រទេសនៅមិនទាន់មានអគ្គិសនីប្រើប្រាស់ពេញលេញនោះទេ។

អភិបាលក្រុងញូវយ៉ក លោក Zohran Mamdani បានមាននិយាយកាលពីថ្ងៃអង្គារថា ជនរងគ្រោះជាច្រើននាក់គឺស្ថិតនៅក្នុងទីក្រុងនេះ ជាទីដែលសីតុណ្ហភាពត្រជាក់បំផុតមិនធ្លាប់មានក្នុងរយៈពេល ៨ឆ្នាំ នៅពេលដែលសីតុណ្ហភាពទាបបំផុតបានធ្លាក់ដល់ជាង -១៣អង្សាសេ។ ការស្លាប់ផ្សេងទៀតនៅទូទាំងប្រទេស បណ្ដាលមកពីមូលហេតុទាក់ទងនឹងព្យុះរដូវរងាដ៏កំណាចនេះ មានដូចជាការថយចុះកម្តៅក្នុងខ្លួនខ្លាំងពេក និងគាំងបេះដូងខណៈពេលកំពុងឈូសឆាយព្រិលជាដើម៕