ទិន្នន័យកាលពីថ្ងៃអង្គារ (២៧ មករា) បានបង្ហាញពីតួលេខដ៏គួរឱ្យភ្ញាក់ផ្អើលនៃទំនុកចិត្តអ្នកប្រើប្រាស់របស់សហរដ្ឋអាមេរិក ដែលបានធ្លាក់ចុះយ៉ាងគំហុកដល់កម្រិតទាបបំផុតក្នុងរយៈពេលជាង ១១ឆ្នាំកន្លះ នៅក្នុងខែមករា នេះ ដោយសារតែក្ដីបារម្ភកាន់តែខ្លាំងឡើងលើទីផ្សារការងារដ៏យឺតយ៉ាវ និងតម្លៃទំនិញខ្ពស់ៗ ដែលអាចធ្វើឱ្យក្រុមគ្រួសារកាន់តែប្រុងប្រយ័ត្នចំពោះការចំណាយប្រចាំថ្ងៃ។

ការធ្លាក់ចុះដ៏គួរឱ្យភ្ញាក់ផ្អើលនេះ ត្រូវបានរាយការណ៍ដោយក្រុមប្រឹក្សាសន្និសីទ ដែលជាដៃគូរបស់ក្រសួងពាណិជ្ជកម្មអាមេរិក គឺជាទិន្នន័យស្ទង់មតិដែលបិទនៅថ្ងៃទី១៦ ខែមករា ទៅលើអ្នកប្រើប្រាស់នៅទូទាំងគណបក្សនយោបាយទាំងពីរ ខណៈអ្នកឆ្លើយតបការស្ទង់មតិ ដែលកំណត់ខ្លួនឯងថាជាអ្នកឯករាជ្យ បង្ហាញទុទិដ្ឋិនិយមខ្លាំងបំផុត។ ទិន្នន័យនេះអាចបន្ថែមសម្ពាធលើលោកប្រធានាធិបតីអាមេរិក ដូណាល់ ត្រាំ ឱ្យដោះស្រាយនូវអ្វីដែលសេដ្ឋវិទូហៅថា «វិបត្តិនៃលទ្ធភាពទិញទំនិញ» ដែលពួកគេបានស្តីបន្ទោសលើគោលនយោបាយរបស់លោក រួមទាំងពន្ធគយដ៏ទូលំទូលាយលើការនាំចូលសកល។

ទិន្នន័យក្រុមប្រឹក្សាសន្និសីទនេះបានបង្ហាញថា សន្ទស្សន៍ទំនុកចិត្តអ្នកប្រើប្រាស់បានធ្លាក់ចុះចំនួន ៩,៧ពិន្ទុ មកនៅត្រឹម ៨៤,៥ពិន្ទុ ក្នុងខែនេះ ដែលជាកម្រិតទាបបំផុតចាប់តាំងពីខែឧសភា ឆ្នាំ២០១៤ មក។ តួលេខនេះគឺទាបខ្លាំងជាងការប៉ាន់ស្មានរបស់សេដ្ឋវិទូ ដែលត្រូវបានស្ទង់មតិដោយសារព័ត៌មានរ៉យទ័រ ដោយពួកគេបានព្យាករថា សន្ទស្សន៍នេះនៅ ៩០,៩ពិន្ទុ។

ខណៈដែលទំនាក់ទំនងរវាងទំនុកចិត្ត និងការចំណាយរបស់អ្នកប្រើប្រាស់ មានភាពទន់ខ្សោយ សេដ្ឋវិទូមួយចំនួនមានក្ដីបារម្ភអំពីការធ្លាក់ចុះ ដែលត្រូវបានអមដោយការយល់ឃើញមិនល្អចំពោះទីផ្សារការងារអាមេរិក។ ទស្សនៈរបស់អ្នកប្រើប្រាស់អំពីភាពអាចរកបាននៃការងារ គឺទន់ខ្សោយបំផុតក្នុងពេលជិត ៥ឆ្នាំ។ ទោះជាបែបនេះក្ដី វិនិយោគិនភាគច្រើនមិនបានអើពើនឹងទិន្នន័យទំនុកចិត្តអ្នកប្រើប្រាស់នេះទេ ដោយសន្ទស្សន៍នៅទីផ្សារភាគហ៊ុន Wall Street កំពុងជួញដូរក្នុងអត្រាខ្ពស់ជាងមុន ប៉ុន្តែប្រាក់ដុល្លារបានធ្លាក់ចុះ ធៀបនឹងរូបិយបណ្ណជាច្រើនផ្សេងទៀត៕