សហរដ្ឋអាមេរិក កាលពីថ្ងៃអង្គារ (២៧ មករា) បានប្រកាសពីផែនការធ្វើសមយុទ្ធយោធាច្រើនថ្ងៃ នៅតំបន់មជ្ឈិមបូព៌ា ខណៈយោធាទីក្រុងវ៉ាស៊ីនតោន កំពុងដាក់ពង្រាយនូវអ្វីដែលលោកប្រធានាធិបតី Donald Trump ហៅថា «កងនាវាចម្បាំងដ៏ធំ» ក្រុមដំបូង ដឹកនាំដោយនាវាផ្ទុកយន្តហោះ USS Abraham Lincoln ទៅតំបន់នេះ ជាផ្នែកមួយនៃការប្រឈមមុខដាក់គ្នាដ៏តានតឹងជាមួយអ៊ីរ៉ង់។

ការសម្ញែងកម្លាំងផ្លូវអាកាសទ្រង់ទ្រាយធំនេះ ត្រូវបានប្រកាសស្របពេលលោក Trump បានលើកឡើងពីវត្តមាន «កងនាវាចម្បាំងដ៏ធំ» មួយក្រុមទៀត ហើយសេតវិមានបានបង្ហើបថា ខ្លួនអាចនឹងបើកការវាយប្រហារថ្មីលើអ៊ីរ៉ង់ ជុំវិញការបង្ក្រាបដ៏បង្ហូរឈាមរបស់រដ្ឋាភិបាលលើហ្វូងបាតុករ ដែលបណ្តាលឱ្យមនុស្សរាប់ពាន់នាក់ស្លាប់ ហើយអ្នកជាប់ឃុំរាប់ម៉ឺននាក់ ប្រឈមជោគវាសនាមិនច្បាស់លាស់។

កងកម្លាំងដែនអាកាសកណ្តាល ដែលជាអង្គភាពនៃបញ្ជាការកណ្តាលសហរដ្ឋអាមេរិក (CENTCOM) បាននិយាយកាលពីថ្ងៃអង្គារថា ខ្លួននឹងបើកសមយុទ្ធត្រៀមខ្លួនរយៈពេលច្រើនថ្ងៃ ដើម្បីបង្ហាញពីសមត្ថភាពក្នុងការដាក់ពង្រាយ បំបែក និងទ្រទ្រង់កម្លាំងទ័ពប្រយុទ្ធច្រកអាកាស នៅទូទាំងតំបន់ទទួលខុសត្រូវរបស់បញ្ជាការកណ្តាលសហរដ្ឋអាមេរិក។ កងទ័ពអាកាសកណ្តាលបានបន្ថែមថា សមយុទ្ធនេះ «ត្រូវបានរៀបចំឡើងដើម្បីបង្កើនសមត្ថភាពចែកចាយទ្រព្យសម្បត្តិយោធានិងបុគ្គលិក ពង្រឹងភាពជាដៃគូក្នុងតំបន់ និងរៀបចំអនុវត្តនូវការឆ្លើយតបដែលអាចបត់បែនបាន»។

គួរឱ្យដឹងថា កាលបរិច្ឆេទ ទីតាំង និងបញ្ជីយុទ្ធោបករណ៍អាមេរិកដែលត្រូវចូលរួមក្នុងសមយុទ្ធនេះ មិនទាន់ត្រូវបានផ្សព្វផ្សាយជាសាធារណៈទេ។ យ៉ាងណាក៏ដោយ សមយុទ្ធនេះហាក់ដូចជារៀបចំឡើងដើម្បីបង្អួតសមត្ថភាពរបស់អាមេរិក ក្នុងការដាក់កម្លាំងក្នុងមជ្ឈិមបូព៌ា ខណៈភាពតានតឹងជាមួយអ៊ីរ៉ង់ កើនឡើងកាន់តែខ្លាំង៕