អ៊ីរ៉ង់បានព្រមានថាប្រទេសជិតខាងនឹងត្រូវបានចាត់ទុកជាគូសត្រូវ ប្រសិនបើទឹកដីរបស់ពួកគេត្រូវបានប្រើដើម្បីបើកការវាយប្រហារប្រឆាំងនឹងខ្លួន បន្ទាប់ពីការមកដល់នៃក្រុមនាវាផ្ទុកយន្តហោះអាមេរិកនៅក្នុងដែនទឹកមជ្ឈិមបូព៌ា។

មេបញ្ជាការកងឆ្មាំបដិវត្តន៍អ៊ីស្លាម (IRGC) បានធ្វើអត្ថាធិប្បាយបែបនេះកាលពីថ្ងៃអង្គារ២៧មករា សប្ដាហ៍នេះ ស្របពេលមានភាពតានតឹងក្នុងតំបន់កើនឡើង។

លោក Mohammad Akbarzadeh អនុប្រធាននយោបាយនៃកងកម្លាំងជើងទឹក IRGC ត្រូវបានដកស្រង់សម្តីដោយទីភ្នាក់ងារសារព័ត៌មាន Fars ថា ប្រទេសជិតខាងគឺជាមិត្តរបស់អ៊ីរ៉ង់ ប៉ុន្តែប្រសិនបើដី មេឃ ឬទឹក របស់ពួកគេ ត្រូវបានប្រើប្រាស់ប្រឆាំងនឹងអ៊ីរ៉ង់ ពួកគេនឹងត្រូវបានចាត់ទុកជាអរិភាព។

ការព្រមាននេះបានកើតឡើងខណៈប្រធានាធិបតីអាមេរិកលោក Donald Trump បាននិយាយថា កងនាវាចម្បាំងមួយក្រុមផ្សេងទៀតរបស់សហរដ្ឋអាមេរិកកំពុងធ្វើដំណើរឆ្ពោះទៅកាន់អ៊ីរ៉ង់ ដោយបង្ហាញពីក្តីសង្ឃឹមថាទីក្រុងតេអេរ៉ង់នឹងយល់ព្រមលើកិច្ចព្រមព្រៀងជាមួយទីក្រុងវ៉ាស៊ីនតោន។

លោក Trump បានថ្លែងក្នុងអំឡុងសុន្ទរកថាមួយកាលពីថ្ងៃអង្គារថា មានកងនាវាចម្បាំងដ៏ស្រស់ស្អាតមួយក្រុមផ្សេងទៀតកំពុងបណ្ដែតខ្លួនយ៉ាងស្រស់ស្អាតឆ្ពោះទៅកាន់អ៊ីរ៉ង់នៅពេលនេះ។

មន្ត្រីអ៊ីរ៉ង់បានព្រមានម្តងហើយម្តងទៀតថា ការវាយប្រហារណាមួយលើប្រទេសរបស់ខ្លួន នឹងត្រូវបានឆ្លើយតបយ៉ាងខ្លាំងក្លា ខណៈជំរុញឱ្យរដ្ឋជិតខាងកុំអនុញ្ញាតឱ្យទឹកដីរបស់ពួកគេត្រូវបានប្រើប្រាស់ក្នុងសកម្មភាពយោធាណាមួយប្រឆាំងនឹងអ៊ីរ៉ង់ឲ្យសោះ៕