រដ្ឋមន្ត្រីក្រសួងការពារជាតិចិន លោក តុង ជុន (Dong Jun) បានប្រាប់សមភាគីរុស្ស៊ីរបស់លោកថា ប្រទេសទាំងពីរនឹង «ពង្រឹងការសម្របសម្រួលជាយុទ្ធសាស្ត្រ» ក្នុងអំឡុងការសន្ទនាតាមបណ្តាញវីដេអូ កាលពីថ្ងៃអង្គារ ទី២៧ ខែមករា នេះបើយោងតាមការចេញផ្សាយរបស់ទូរទស្សន៍រដ្ឋ CCTV។

ការអំពាវនាវនេះ បានធ្វើឡើងប៉ុន្មានថ្ងៃបន្ទាប់ពីអ្នកចរចាមកពីរុស្ស៊ី និងអ៊ុយក្រែន បានជួបប្រជុំគ្នាដើម្បីពិភាក្សាអំពីផែនការដែលត្រូវបានសម្របសម្រួលដោយសហរដ្ឋអាមេរិកដើម្បីបញ្ចប់សង្គ្រាម រយៈពេលជិតបួនឆ្នាំបន្ទាប់ពីការឈ្លានពានរបស់ទីក្រុងមូស្គូ ដែលរដ្ឋាភិបាលប្រទេសលោកខាងលិចចោទប្រកាន់ទីក្រុងប៉េកាំងថាអាចផ្តល់លទ្ធភាពបន្តសង្គ្រាម។

លោក តុង បានប្រាប់សមភាគីរុស្ស៊ី លោក Andrey Belousov ថាប្រទេសចិនមានឆន្ទៈធ្វើការជាមួយរុស្ស៊ី ដើម្បីពង្រឹងការសម្របសម្រួលជាយុទ្ធសាស្ត្រ និងធ្វើឲ្យប្រសើរការផ្លាស់ប្តូរយន្តការ។

លោក Dong ក៏បាននិយាយផងដែរថា ប្រទេសទាំងពីរនឹង «រួមគ្នាបង្កើនសមត្ថភាពក្នុងការឆ្លើយតបទៅនឹងហានិភ័យ និងបញ្ហាប្រឈមផ្សេងៗ និងរួមដៃគ្នាក្នុងវិធីជាវិជ្ជមានក្នុងសន្តិសុខ និងស្ថិរភាពសកល»។